Esta ye la mia collaboración d'esti annu nel Certame "Versos a Oliegos". Cumu tou en Tokyo nun podré lleela mannana y sedrá la mia collacia Lláncara quien lu fadrá nel mieu nome. Gracias asgaya Lláncara!!! Y a tolos que la gueyéis nesti Llagu, asperu que vos preste!!!
De nueche, yera de nueche,
cuandu marchonun del pueblu,
deixandu pur tras de sí
casas, tierras y alcordancias,
los sous muertos, la sua eigrexa,
la sua hestoria, la sua vida...
Yera untavía de nueche,
n'aqueilla seruenda fría...
andandu van a Porqueros
onde pasaban las vías
d'un tren que diba llevayes
dende Llión a Castiella,
obligaos a treslladase,
hacia outra tierra, outra vida,
ensín alcordancia dala,
ensín pasau, ensín risas.
Ónde quedorun los dreichos
d'aquel pueblu y sus familias?
Cúmu esqueicen la xusticia!
Cúmu estruyen las vidas!
Nun se siente ni un glayíu,
camín ensín allegría,
sólu sospiros y llárimas,
aqueilla pena maldita,
qu'enchenaba las suas ánimas,
d'una tristura infinita.
De nueche marchan d'Oliegos,
nun tornarán... na sua vida.
Sólu quedan alcordancias,
estos versos, estas rimas,
y remanez nesta tierra,
la pesadiella d'Oliegos.
Afayaivos nel Llagu la Xana, un piquennu requeixu de llibertá nel País Llïonés, onde podedes unviare los vuesos escritos na llingua de nuesu, la llingua llïonesa, primeira cun un testu escritu na península. Tamién alcontraréis eiquí testos n'outras llinguas minorizadas y nuevas sobru eillas. La Xana creye que chegare a pescanciar outras llinguas paga la pena de facere l'esfuerciu d'a lu menos lleelas.
No hay comentarios:
Publicar un comentario