Eiquí tamos, nesta Praza
de la ciudá de Llión
pa removere concencias,
neste tiempu de Pasión.
Venimos daivos la nnuncia,
una vuelta y outra más
que mannana ensín tardanza
Nuesu Sinnor morirá.
Dimpués lu pregonaremos
delantre la Catedral
na Plaza Santu Sidoru
y na Casa la Poridá.
Oh Xuasús de l'Agonía
Sinnor de la Llibertá
alcuérdate del tou puebru
que guei penandu yá tá.
Virxe nuesa del Camín,
protexe una vuelta más
los tous fiyos que te piden
trabayu y felicidá.
Patronos del Vieyu Reinu,
Santos Marcelu y Froilán,
bendecinos dende'l cielu
nun nos deixéis ensín más.
Sayagu, patrón d'Hespanna
nun tenemos d'esqueicere
que fuste patrón del Reinu
enantias qu'eilla esistiere.
Chamamos al nuesu puebru
que venga venos rezare
y tamién acompanganos
pur esta guapa ciudade.
Nos sous cimeiros requeixos
nnunciaremos el supliciu
que pur salvar los sous fiyos
padeciera nel aniciu.
Vienres Santu, Vienres Santu
las tinieblas cayerán
cuandu a las tres de la tarde
Nuesu Sinnor morirá.
Vienres Santu pula tarde
diremos procesionare
Confrades Siete Palabras
pa podete adorare.
Alzái, alzái llïoneses
ye la houra la verdá
el Nuesu Sinnor los Balderas
ceu procesionará.
No hay comentarios:
Publicar un comentario