lunes, julio 23, 2012

Vacancias en Xapón: Xullu y 19

El segundu dia en Xapón tuvimos visitandu El Palaciu Imperial, Akihabara (la cai eléutrica y el Kanda Myojin.

Cumu tamos de vacancias y pesia qu'esta vuelta tou llevandu bastante bien el desfase horariu (jet-lag) nun tamos madrugandu, ente outras cousas purque dalgunos días, cumu diz la mía fiya, nos duelen partes del cuerpo que nin sabíamos qu'esistían.

Esti fou'l primer día qu'anduvimos en metru "a tou tren" (nunca miyor emplegada esta frax, hahaha) tuvimos de facere deillos trasbordos y entrugare deillas vueltas a los emplegaos del metru, tantu pul itinerariu cumu pulos precios los billetes purque hai que sacalos d'unas máquinas nas qu'hai que marcar el preciu'l billete. Si sacas un preciu menor nun hai problema purque ties la posibilidá (ou miyor la obligación) de pagare la diferencia na salida peru si pagas de más, lu pierdes y nun tán los tiempos pa perdere dineiru ¿nun vos paez?

Bonu, trés la "escursión" nel metru chegamos a la estación de Nijubashimae pa dir al Palaciu Imperial onde vive l'Emperaor cuna sua familia. El palaciu nunca nun puede visitase y los xardines interiores del Palaciu tán abiertos sólu dúas vueltas a l'annu: n'Avientu y 23, cabudannu de l"Emperaor, y en Xineiru y 2, cul motivu l'Annu Nuevu, asina que solu pué vese l'esterior y el parque d'alreol peru la vista'l palaciu pur cima'l puente Nijubashimae paga la pena.



Baixu un sol de xusticia y cun fuegu nel ambiente díbamos getandu la solombra pul parque cumu los perrines "cuna llingua colgandu" y nesi intre entamóu nnublase y un viento terrible que cuasi, cuasi nos deixa ensín bandeira. Gueyamos tamién el puente Nijubashimae (que da'l sou nome a la estación de metru) d'acesu al Palaciu y la puerta prencipal sixilada pula guardia imperial. Nel fosu qu'arrodia las murias del palaciu hai cisnes y carpas.

Puente Nijubashimae cul Palaciu Imperial al fondu

Nel orixe, cuandu l'Emperador vivía en Kyoto, esti palaciu yera propiedá de los shogun Tokugawa, que dominaron Xapón dende'l 1600 ata'l 1867, cuandu l'Emperador yes derrotara y matara, recuperandu'l poder y treslladandu la sua residencia dende Kioto al Castillo d'Edo (el sou nome enantias de sere Palaciu Imperial).

Cumu diz el mieu collaciu Tonnu, ata'l Mikado ye llïonesista




Dimpués queríamos dir a un museu piquinnin que taba bastante cerca peru nun fuimos quienes a alcontralu y pur cima un xaponés, cun mui bona voluntá peru mui pouca conocencia d'inglés, camudou la direición asina que dimpués d'andare cumu alloriadas cuna calor que facía ensín alcontralu, marchamos ata Akihabara, la cai eléutrica, cumu la chaman los xaponeses y onde tamién hai dalgunos llugares cun "anime" y "manga" y onde las rapazas que trabayan en eillos van amazcaradas (anque la mía fiya diz qu'eisu ye "cosplay" ou dalgu asemeyau, hahaha).



Presonalmente, y cumu nun sou mui aficionada a la tema eleutrónica, nun me prestóu mueitu peru lu que me prestóu asgaya fou la visita al Kanda Miojin, un templu shintu guapísimu del sieglu VIII, nel que, pur desgracia, nun deixan tomare semeyas nel interior.


Entrada'l Kanda Myojin





Dimpués marchamos ata Nicholai-do, la igrexa ortodosa de Tokyo que taba pechada, peru cun un esterior mui guapu y, sobru tóu mui inasperau nun país cumu Xapón.




Y pul camín, ensín pensalu, nos alcontramos cul Yushima Seido, outru templu bien guapu, nesti casu budista del sieglu XVII y cun influencia chinesa.




Pa finare, derrotadas de tantu andare, cumu podedes apreciare pula mía espresión, fuimos cenare y dimpués a l'hotel.

Faciendu patria cuna camiseta de Raigañu
(Vos dais cunta cun que mayestría xantu cun palillos???)

Arroz cun pollu empanau, guevu, cebolla y dalguna clas d'algas. ¡¡¡Riquísimu!!!

Curry xaponés, tamién mui ricu peru mui desemeyau del curry indiu

No hay comentarios: