Cuandu asentéi un poucu l'andorga, salimos y la primeira cousa que ficimos fou mercare dous parauguas (pulos que pagamos l'astronómica cantidá de ¡¡¡UN EURO CUN 14%!!! caún, vamos que nun paga la pena acarriare'l parauguas dend'Hespanna) ya que anque nesi momentu nun chovía el día taba mui variable y tuvimos d'usalos más tarde, deillas vueltas.
El vienres teníamos planiau dir al Templu Zojoji y a la Torre de Tokiu pa gueyare tola ciudá dende l'altu peru cuna chuvia y la nneblina la vista perdiera tol sou interés asina que visitamos el Templu, impresionante cumu tolos que llevamos vistos y ficimos una riestra semeyas tantu d'él cumu de la Torre de Tokiu que tá cuasi pegada'l Templu.
El Templu Zojoji ye un templu budista (Jodo Shu) y fou'l templu prencipal de la familia Tokugawa, nel tiempu'l sou shogunatu. Los Tokugawa, cumu vos dixera na entrada anterior, dominaron Xapón dende'l 1600 ata'l 1867.
Templu Zojoji
Delantre de Jizo (*) y las ofrendas, nun esqueicimos "amiyorare" la semeya cun una bandeira prestosísima
(*) Jizō, (Ojizō-sama) ye'l proteutor las ánimas los bebés que nunca nun nacieron y los que morreron de piquinnines que cumu nun fizun suficientes bonas aiciones nun pueden chegare a la vida dimpués la muerte. Pur eillu nos cimiterios y en dalgunos templos hai piquennas estatuas Jizo vistías cun gorrines y bufandas de bebé y cun dalgún xugete (nesti casu piquennos moliniellos de vientu).
Templu Zozoji y Torre de Tokiu
Impresionante puerta d'acesu al Templu
Las "pias de Buda" cuna rueda los ochu preceutos
Sigimos amiyorandu las semeyas...
La capilla
Dimpués de visitare'l templu, fuimos al metru y nos diriximos hacia Harajuku, fasteira comercial dedicada sobru tóu a los "teenagers" (y a tolos que quieren sigire pareciéndulu) y caleyamos pur una zona enchena de tiendas, toas eillas en rebaixas y onde puede mercase un poucu de tou, cimeiramente ropas de desemeyadas tribus urbanas. Visita mui interesante y dalgunas vueltas sorprendente pulas ropas que pueden alcontrase.
Alcontréi mui curiosu qu'en dalgunas tiendas nun deixaban probase los artículos rebaixados y tamién que las dependientas, si nun tienen xente p'atendere, salen a la puerta y "glayan" los artículos p'animare a la xente a mercare.
Harajuku
Cumu nosoutras somos bastante normalinas, mercamos unas "converse" (culor Llión) rebaixadas pur 3.990 yenes (42 euros) ¿Nun tá mal, verdá?
Y cumu, un día más tabamos riladas de tantu visitare y caleyare, cenamos eillí mesmu, nun restaurante xinés y cumu'l menú yera bilingue, xaponés y xinés, pidimos pulas semeyas. Lu primeiru untavía nun sabemos lu que yera peru taba mui ricu y lu segundu yera gochu agridulce. Cumu tinían las cerveixas n'ufierta (200 yenes menos, cuasi a mitá de preciu), la camareira entrugonos si queríamos cerveixa. Dambas diximos que sí, peru en Xapón sólu puede bebese (cerveixa, vinu, ect.) siendu mayor d'edá y lu miyor de tóu yé que la mayoría d'eda chega a los venti annos, asina qu'en tioría la mia xanina nun podía bebere!!!
La prueba del "delitu"
Dimpués marchamos pal hotel a descansare purque'l día darréu díbamos pa Kyoto!!!
No hay comentarios:
Publicar un comentario