ALCORDANZAS D'ESCOLINES

Nestos tiempos que'l cursu fina y los escolines tán ya pensandu nel branu, la mía collacia Lláncara, sintiendu la nostalxia'l pasaú, unvióume'l testu darréu. Asperu que vos preste.

Tornan guei alcordanzas d'escolines.
Los días de cole cul uniforme azul y zapatones prietos que tenían que durare tol cursu y… mancaban.
Los calcetos branquines de los días de fiesta.

Tolas mañanas díbamos pul camín de lleiras del xardín al lláu la estación
Si sentíamos el tren, asperábamos pa chusmiare los viaxeiros
Ou pa tar arrodiáos pulas ñubes de vapor de la máquina.
Asina que la fuercia los días chegábamos tarde,

“Copiai venti vueltas: nun lu volveré a facere”
Un día, turriona y farta de tantas copias, escribí “ ye mentira” outras tantas vueltas.
¡Llástima! la mayestra nun las lleyóu y fízulas cachines.

Dimpués, la murnia de repetir aqueillos verbos de tiempos compuestos.
Raros enforma purque na mia cá enxamás nun los sentí.
Los problemas de trenes tampoucu nun fui a pescancialos.
Los trenes marchan y dalgunas vegadas... escarrilan.

Dacuandu, atoupu aqueillos collacios
¿Alcuérdasti lu que falabamos d'escribir hestorias?
Tu facerías los dibuxos, you pondría los testos.
Agora, toos somos un pouco más vieyos, muietu más grises.
You tengu teliarañas na tiesta y borrina nos gueyos.

LLÁNCARA, Mayu y 30, 2010.