sábado, febrero 20, 2010

COPLINA DEL VENTI-DIEZ

Bonu, finóu l'antruexu y yá tamos nel tiempu Cuaresma peru.... faltaban las Coplas y eiquí vos deixu una coplina de la mía amiga Lláncara.

Nun séi si vos cuntéi dalguna vuelta que'l nome "Lláncara", na mía opinión, cuadra mui bien cul de "Xana" (quiciabes pur esu somos amigas hahaha). ¿Vos alcordais del "Filandón de San Pelayo", aqueilla película cuasi mítica na que cincu escritores llïoneses facían un filandón al Santu Pelayu, contánduye cincu hestorias bien guapas?

Nuna d'eillas, creigu que la d'Apariciu (si, collaci@s, el mesmu Juan Pedro que guei ye'l comisariu, cuasi domesticáu, nomau pa la cellebración del 1100 Cabudannu del Reinu de Llión) cuentanos la hestoria d'una xana cul nome de Lláncara, ¿pescanciais pur quéi digu que dambos nomes cuadran mui bien?

Y dimpués d'este desvíu, deixuvos la coplina de Lláncara que, na mía opinión ye mui guapa y merez el premiu nel Carnaval de La Bañeza (anque nesa ciudá nun deixan presentare coplinas en llïonés ¿sedrá que'l llïonés nun ye una llingua hespañola, nel pensamientu d'esa xente?

TAMOS EN TIEMPU DE COPLAS, ¡CHEGA L´ANTRUEXU OUTRA VÉ
CUNA ÑEVE AMENAZANDU MENTANTU TOMU CAFÉ
ESCRIBU UNA NUEVA COPLA ANQUE NUN SEPA DE QUÉI
L’AÑU PASÁU CUN CRISIS Y CUN GRIPES A, B y C
¡QUEIXAIVOS AL PRESIDENTE! LA CULPA DE ZETAPÉ
EL MAL TIEMPU, LAS ÑEVADAS, EL PARU Y EL YOU QUE SÉI
EN LA BAÑEZA SIÑORES, QUIER ARRUCHARE’´L PEPÉ
NOMAN MUEITAS CARAS NUEVAS, FACEN BIEN DE PARIPÉ
¡ESTA QUIERU QUE ME PRESTA!, ALTA DAMA NEL PAPEL
CAMBALACHES CONCEXILES, ESCUITAS A TUTIPLÉN
YÁ VEREMOS CUANTU DURAN LOS QUE NAGUAN EL PODER
L´ALCALDE BALANCÉASE, QUE NEL SUELU NUN SE TIEN
NOS PARQUES QU´INAUGURAN ENSIN REMATARE BIEN
NUEVA DÓMINA, NUEVU AÑU ¡CHEGA L´ANTRUEXU OUTRA VÉ!
EL ROSCÓN DE LOS REIS MAGOS CUL CHEQUE QUE NUN PILLÉI
EL GOCHO YÁ TA SORTEÁU, LOS “CHORIZOS” ¡AL SARTÉN!
NEL HOGAR DEL XUBILÁU PASODOBLES Y CUPLÉS
CUNA MÚSICA QUE RINCHA AQUEILLU DEL “VEN Y VEN”
QUE NUN VA FALTAYES PAGA, MANDE PESOE OU PEPÉ.
EL SENADOR PALAZUELO RELLÁMBESE DE PLACER
CEU HABRÁ UNA PLAZA NUEVA, TIATRU, INAUGURACIONES
¡MUEITAS CINTAS CORTARÉI!
LA CRISIS, ¡COUSA DE PROBES! LAS HIPOTECAS ¡TAMIÉN!
POLÍTICOS GAYOLEIROS Y LA OPOSICIÓN ¡YÁ SE VE!
CALENTANDU LOS SILLONES QUE NAMÁS SON A FACER
LOS IMPUESTOS PULAS ÑUBES, LOS COMBUSTIBLES TAMIÉN
SIGIREMOS CUNAS COPLAS Y QUE LAS IMPRIMAN BIEN
SIN ERRAS D´ORTOGRAFÍA QU´ESTU YÁ TIEN EL SOU AQUEL
QUE NUN NOS QUITEN PALABRAS, QUE NUN FALTEN” HACHE” OU “BE”
¡AY QUE LA CRISIS ME MATA Y ACÁBASEME´L PAPEL!
YÁ ME PASÉI CUNOS VERSOS Y TENDREILOS QU´ENCOYER
NESTAS DÓMINAS D´ANGUAÑU Y ANQUE ESCRIBA EN INTERNET
TENGU D´ESCRIBIRE COPLAS SINÓN ME FALTA DAQUÉ
YE QUE NUN FINAN LAS TEMAS Y ENTOVÍA NUN ROBRÉI
NUN ESCRIBU UN RES A NÓMINA
¡¡¡ANÓNIMA ROBRARÉI!!!

LLÁNCARA , FEBREIRU y ANTRUEXU de 2010

1 comentario:

LLANCARA dijo...

Gracias Xanina pulos tuos comentarios tan cariñosines. Guei tengu d´agradecer a la Peña La sardina que ¡pur fin! diénunme´l trofeu que me debían del 2008 cul Diploma correspondiente. Dicía Caitanu Bardón qu´esta tierra tenía tanta poesía que podía fasta ufiertala de baldre. Nun lu tomen pur soberbia. Préstame asgaya escribire y sólu pur esu lu faigu. Regalaivos.

Pregón del I Encuentro de Cultura Tradicional "Valle de Gordón"

La Pola de Gordón, 14 de mayo de 2022 Buenas tardes: Es para mí un gran honor pregonar este I Encuentro de Cultura Tradicional “Valle de...