miércoles, enero 06, 2010

Autonomía Llïonesa YA!!!

Nestos momentos tou sofitandu 14 causas nel Facebook. Creigu que toas eillas son “xustas y necesarias”, cumu dicen na igreja, peru la primeira que conocí y sofitéi ye la que tá más cerca’l miu coral.

Ye “Autonomía para León”, el nome nun me presta mueitu purque puede creare confusión peru camientu que naide puede dudare que, nel miu casu, tá nidiu que “Llión” nun pué referise nin a la ciudá, nin a la provincia sinon al REINU DE LLIÓN.

Los llïoneses nun deseyamos l’autonomía purque seyamos “separatistas” ou “insolidarios” ni tampoucu pur nun tare gayoleiros cul “repartu económicu” (que nun lu tamos) sinon pula nuesa necesidá de vivire y ser reconocíos cumu: LLÏONESES, lu que fuimos, somos y sedremos peru que pula mor d’unos políticos más priocupaos pula súa faltriqueira que pula xusticia, chevan 26 años tratandu camudanos ata'l nome.

Desiximos que se respete’l dreichu los nuesos fiyos a conocere la súa hestoria ya’l sou pasáu pa miyor preparare’l sou futuru, a deprendere ya estudiare la nuesa llingua llïonesa (a más de mueitas outras que ya falamos) ensin chamanos pur eillu “pueblerinos” ou cousas piores, a que’l patrimoñu de nuesu (monumental, hestóricu, enográficu, industrial imaterial, etc.) seya protexiu, promociunau, conocíu y respetau.

Esti añu ye’l 1100 Cabudañu’l Reinu de Llión, data mui importante na hestoria, nun solu llïonesa, sinon hespañola y tamién urupeya peru, tantu dende la Junta cumu dende’l goviernu central, tratan que pase ensin publicidá denguna ya ensin” pena ni gloria”. Tien el sóu aquel que guei, Xineiru y 6, nun esista entavía un programa oficial de celebraciones zarrau. Ente los poucos autos programaos tien las arrancadeiras d’incluyire la restauración la fachada de Santu Sidoru, ¿sedrá que solu restauran monumentos si hai daqué que cellebrare?

Pur eillu vos animu que vos faigais almiradores del nuesu Facebook "Reino de Leon, 1100 Años"

http://www.facebook.com/note.php?created&&suggest&note_id=386754120036#/pages/Reino-de-Leon-1100-anos/213674653708?ref=nf

Tamién vos animu visitare la nuesa páxina gueb “1100 Aniversario del Reino de León”

http://www.1100aniversarioreinodeleon.com/

Y a xuniros a la causa de "Autonomía para León":

http://apps.facebook.com/causes/209727

Gracias asgaya pul sofitu y pula publicidá que faigais d’estas ñiciativas.

¡¡¡BON 1100 CABUDAÑU, REINU DE LLIÓN!!!

1 comentario:

El barquero leonés dijo...

A mi lo que más me duele es la pérdida de mi pasado, y la negación del futuro. El presente ya lo peleo yo, ¿pero cómo les explico a mis hijos que el pueblo leonés se volvió cobarde, y se dejó exterminar por unos ruines y vanidosos personajillos de segunda fila, y su vida la tendrán que hacer, casi irremediablemente, lejos de la tierra que les vió nacer?