¡Lleón llibre!

Cuceandu na rede, alcuntréi, cun esti títulu, l'artículu que vos copiu, robráu pur Ismael GONZÁLEZ ARIAS ya espublizáu, va añu y meyu (esautamente n'Avientu y 28, 2006) na "Nueva España" d'Uvieu

Las negrinas son de mieu pa chamare la vuesa atención sobru dalgunos aspeutos más interesantes. Creigu qu'hai que lleelu atentamente, mesmu si nun tamos d'alcuerdu en deillas cousas de las que diz.

Anque ta escritu na variante asturiana la llingua llïonesa tou cierta que podedes pescancialu ensín dulbia dala.

La reforma del Estatutu de Castilla y León tien a los lleoneses poco contentos: manifestaciones y encuestes falen d'una nueva sensibilidá fuera de Castilla.

Llevo varios años escribiendo artículos sobre l'Asturies Cismontana, una tierra bastante desconocida pa los asturianos tresmontanos, nosotros, y qu'ocupa comarques agora desperdigaes per Lleón, Zamora, Tras-os-Montes y Ourense.

Una tierra tan escaecida de sí mesma que, de la que s'ellaboró'l mapa de les autonomíes nos años ochenta del sieglu pasáu, quedó amestada a Castilla.

Un antigüu reinu que nun fue quien, sorprendentemente, a facer valer el so sentimientu frente a los intereses políticos del momentu que los dexaron amestaos a Castilla. Una estraña y ficticia Castilla que perdía territorios como La Rioja, que sí algamaba l'autonomía, ensin nenguna tradición hestórica. Por nun falar de Cantabria, del mesmu Madrid, o del fechu de la separación irreal ente una Castilla y León y una Castilla-La Mancha.

Más de dos mil persones salieron a la cai na capital lleonesa nel mes de San Xuan d'esti añu y desixeron na plaza de Guzmán el Bueno l'autonomía pa Lleón. El mes pasáu, la manifestación vuelve repitise, y esta vez el númberu d'asistentes dobla con creces el de l'anterior convocatoria.

Esti mesmu mes, ye la Diputación de Lleón la que complica la redacción del nuevu Estatutu de Castilla y León cuando abre la posibilidá de que'l vieyu reinu adquiera identidá propia, al delláu de Zamora y Salamanca, o abriendo la puerta a una xuntanza con Asturies.

Un debate que nun llega a Asturies más qu'al traviés d'escases noticies en prensa, como la recoyida va unes selmanes en LA NUEVA ESPAÑA, pero que se mantién viva selmana tres de selmana na prensa lleonesa con continuu intercabiu d'opiniones y comentarios al respectu.

Un debate qu'incluye la defensa de la llingua lleonesa y el regresu a los vieyos llímites del Reinu de Lleón.

Hestoria reciente

Nel añu 1977 Martín Villa fue nomáu secretariu xeneral de la UCD. Añu del primer proyectu d'Estututu castellano-lleonés. Un proyectu ellaboráu dende Valladolid y que nun cuenta na so redacción con nengún diputáu lleonés. Que, como reflexa la prensa de la época, entérense del proyectu y de les delliberaciones polos medios de comunicación. Hasta'l puntu de que la Diputación de Lleón fala na prensa de la marxinación sufrida y el PSOE de la capital afirma que Lleón ye una rexón hestórica.

Viendo que l'autonomía castellano-lleonesa va p'alantre, depués de que consiguieran salise d'ella Cantabria y La Rioja, y qu'a puntu tuviera de consiguilo Soria mesmo, el 18 de marzu de 1978 tien llugar la primer gran manifestación a favor de l'autonomía lleonesa. Dos meses más tarde el Conseyu de Ministros aprueba el proyectu de preautonomía castellano-lleonesa.

La gran esperanza lleonesa aparez n'ochobre de 1979, cuando Martín Villa ye nomáu presidente de la Comisión d'Autonomíes pol Gobiernu de la UCD. Esti nomamientu fue mui mal vistu dende Valladolid, qu'aseguró na prensa que se facía «para propiciar una autonomía de las tres provincias del antiguo Reino de León». Dende la oposición, el secretariu del PSOE, Felipe González, apunta que «este tema sólo a los leoneses les compete».

Esta esperanza queda ferida de muerte cuando a primeros de 1980 el propiu Martín Villa declara: «Con el corazón en la mano, hubiéramos preferido votar por León solo, pero han primado las razones de Estado». Una razón estraña qu'enxamás entendieron los que vieron que prosperaben l'autonomía en La Rioja y Cantabria.

El tema prosperó col votu a favor d'UCD y del PSOE. Por más que, malapenes tres años más tarde, la Diputación de Lleón, col apoyu de los mesmos partíos políticos, presenta una moción pa dexar ensin efectu l'alcuerdu algamáu en 1980.

Nel añu 1983 salieron a les cais de Lleón más de venti mil persones, que llegaron a ser cuarenta mil na del añu siguiente. Con too, l'autonomía castellano-lleonesa salió alantre y llegó, ensin mayores cambios, a l'actual reforma, periodu que vuelve recoyer les convulsiones d'otrora y abrir les feríes que venti años atrás nun quedaran cerradas.

Un poco d'hestoria pasada

En dellos momentos d'esi procesu falóse de la posible xunión ente Lleón y Asturies, dalgo que nun gustó malapenes nada p'acá de la cordelera Cantábrica. Tratábase de recomponer el pasáu Conseyu d'Asturies y Lleón, del tiempu de la guerra civil. Pero yera ésti un pasáu que nun quería tocar pa nada'l Gobiernu asturianu del momentu, bien poco autonomista y que namás acabó siéndolo dientro de la corriente xeneral del «café para todos» del tiempu.

Arriendes de que'l PSOE asturianu nun quería, pa nada, asumir qu'un presidente del so partíu declarara la soberanía d'Asturies frente a l'abandonu de la República. Dalgo que pa sí quixeran Cataluña o Euskadi, pero qu'enxamás interesó pa nada n'Asturies.

El casu lleonés llama l'atención. El Reinu Lleonés tien una entidá hestórica clara dende'l final del Reinu Asturianu y, en bona midida, nun ye más que'l so continuador. Pero taba claro que la hestoria diba tener poco que ver col repartu autonómicu de los años ochenta.

Tovía nel sieglu XVI, Felipe II llámase a sí mesmu rey de Castilla, de Lléon, d'Aragón, de les dos Sicilies, de Xerusalén, de Navarra, de Granada, de Toledo, de Valencia, de Galicia, de Mallorca, de Sevilla, de Cerdeña, de Córdoba, de Córcega, de Murcia, de Jaén, de los Algarves, d'Algeciras, de Gibraltar, de las Islas Canarias, de les Indies, conde de Barcelona, señor de Vizcaya y de Molina, duque d'Atenas y Neopatria, conde del Rosellón y de Cerdaña, marqués d'Oristán y de Gociano, archiduque d'Austria, duque de Borgoña, Bravante y Milán, conde de Flandes y el Tirol... y un llargu etcétera. Y, como él, cualquier otru de los reis d'España.

Los llímites del Adelantamientu de Lleón, ancargaos por Felipe II, correspuéndense colos de l'Asturies Cismontana (ensin les comarques de Tras-os-Montes, que pertenecen a Portugal, y les propies que lo son d'Ourense). La frontera sur yera'l Dueru y, en bona parte, la este, yera la propia del ríu Esla, l'antiguu Ástura, el ríu que daba nome a esta tierra.

Felipe V, en 1720, divide España en Intendencies, contando con una Lleón. Nel Nomenclator de Floridablanca, del sieglu XVIII, constátase que les provincies del vieyu Reinu de Lleón teníen un tratamientu alministrativu diferencial, manteniéndose la figura de los alcaldes pedáneos y el sistema de conceyos. Mesmo nel sieglu XIX, los habitantes del Bierzu, Senabria, El Páramu o La Montaña Lleonesa identifíquense nos protocolos notariales como miembros del Reinu de Lleón.

Fue José Bonaparte, durante'l periodu de la ocupación francesa, el que proyectó en 1810 una nueva organización alministrativa y territorial, dividiendo'l país a la francesa en prefectures y subprefectures, col propósitu non ocultu d'eliminar les divisiones en reinos, principaos y señoríos del Antiguu Réximen. Pal casu d'Asturies, la Prefectura del Cabu Peñes tenía por capital Uviéu. Nel de Lleón, la Prefectura del Esla tenía por capital Astorga.

Les Cortes de Cádiz retomen esta idea ilustrada y decreten la supresión de los antiguos reinos y demás divisiones coles que contaba España. Con too, el regresu al poder de Fernando VII y l'abolición de la Constitución de Cádiz fizo que se volviera al antiguu esquema político-administrativu.

La división territorial en provincies de 1822 organiza la Rexón de Lleón en cuatro provincies: Lleón, Villafranca'l Bierzu, Zamora y Salamanca. Per último, la división de Javier de Burgos de 1833 ye prácticamente una reproducción del citáu de 1822. Con dalguna pequeña diferencia, como por exemplu la de que la rexón de Lleón queda establecida en tres provincies: Lleón, Zamora y Salamanca.

Pa esta división atendióse a criterios de racionalidá xeográfica, como la estensión del territoriu y la so población, amás de la propia coherencia xeográfica. Pero intentóse especialmente nun ser fiel a la hestoria.

Esta división caltúvose hasta los años ochenta del sieglu XX, nos que se creó'l mapa de les autonomíes. Nesti momentu fue Lleón l'únicu territoriu español que nun consiguió facer valer la so identidá, quedando'l so territoriu incluyíu dientro de Castiella.

Siendo agora, cuando se tiende a la revisión de los estatutos d'autonomía, cuando Lleón intenta dar carta d'identidá a les sos vieyes aspiraciones. La resolución de la Diputación de Lleón nesti sentíu dexa abiertu'l campu de les posibilidaes: xunise a Asturies y retomar el vieyu Conseyu d'Asturies y Lleón o facelo con Zamora y Salamanca y volver a la llinia trazada pa la rexón de Lleón de 1822 y 1833 y que pervivió hasta los años ochenta pasaos. O, cómo non, regresar al proyectu del antiguu Reinu de Lleón y xuntar Asturies, con Lleón, con Zamora y con Salamanca.
Cualquiera de les posibilidaes ta enllena de problemes y el so solu planteamientu va tar cubiertu d'escayos.

La población del Principáu d'Asturies, en llinies xenerales, nun se siente vinculada a nengún d'esos proyectos. Y, poles noticies de la prensa, les rocees nun paren de sucedese en Salamanca, más que nada, pero tamién en Zamora y nel mesmu Lleón.