perdíme nel tou abrazu carinnosu
sintiendu la grandeza del mieu Reinu
vagéi cumu viaxeru venturosu.
Pelerina de la hestoria... y del futuru,
suannéi espierta y sentime viva,
sentada nun requeixu oscuru,
esqueiciendu las problemas de la vida.
Penetréi nel fríu del tou vientre,
almiréi de los vitrales la guapura
quedandu ensín aliendu... ensín pallabras...
al gueyare la tua lluz, tu fermosura.
Fuisti termas cul romanu,
palaciu del gran Ordonnu,
románica Catedral
y de la xusticia escannu.
Quedaste piquenna nestoncias
pa una ciudá que crecía
y en vuelta de remodelate,
tuviste de sere abatía.
L'outavu los nuesos Fonsos
entamóu los tous cimientos
y rexurdisti a la vida
van agora ochu sieglos.
Ergía na tua plaza,
oservas los llïoneses
festeyandu Santu Fruela
SaXuan ou Selmana Santa.
El tou pueblu, la tua xente,
l'aire los nuesos Pendones,
facen nuesas tradiciones
remanecere presentes.
Ayalga la mia tierra y la mia vida.
Maraviella del arte y la cultura.
Alcordancias la mia infancia yá llonxana.
Santuariu de la paz y galanura.
Dende Ordonnu ata Fonsu embellecía
espurres p'hacia'l cielu tu bravura
yeres pur tol Reinu bendecía,
Catedral de Llión, gloria y dolçura.
Xana
No hay comentarios:
Publicar un comentario