miércoles, febrero 26, 2014

Infelí Cabudannu!!!

Guei van 31 annos de l'aprobación del Estatutu de Castiella Y Llión y creigu que tenemos de facere un esame profundu de la situación na que nos alcontramos nesta auto-NO-mía, creyada nos despachos, escontra la rïalidá hestórica y cultural y escontra los sentimientos la mayoría'l pueblu llïonés que tien salíu deillas vegadas en manifestación glayandu pulos sous dreichos pisoteaos pulos políticos esqueiciendu ensín motivu dalu la propia Costitución de 1978.

La rïalidá ye que 31 annos dimpués, los llïoneses somos más probes, tenemos más paru, mueita más emigración, tamos más enveyecíos y somos menos tantu si facemos la comparanza cunos datos d'enantias la esistencia d'esta comunidá nun deseyada y mui contestada cumu si facemos la comparanza cunos datos aututales de las provincias castiellanas que tán na mesma comunidá.

Y si daquién tien dalguna dulbia solu tien de gueyare la mapa qu'acompanga esta nota, espublizada guei, Febreiru y 25, n'ileon.com.



Craru que cúmu pué falase de "comunidá" cuandu ente la renta más alta (de duas provincias castellanas, Valladolid y Burgos) y la renta más baixa (d'una provincia llïonesa, Zamora) hai una diferencia de 39 puntos porcentuales? Cumu nun me cansu de dicire esas desemeyanzas nun son propias d'una comunidá (ésa onde la xunidá faz la fuercia) sinon d'un réxime colonial onde "la metrópoli" vive mueitu miyor gracias a la esplotación los recursos de "las colonias".

Dimpués de gueyare estos datos demoledores ata pal espíritu mesmu d'este inventu, tovía queda daquién que siga diciendu que "miyor xunios" cuandu tá nidiu qu'esta xunidá impuesta solu ye'l meyu pa llegalizare l'espoliu premeditau del pueblu llïonés? Asina que, digan lu que digan, los llïoneses nun tenemos un res de cellebrare.

Peru lu que tovía ye pior ye gueyare cumu dende'l goviernu la comunidá, sigen tratándunos a las tres provincias llïonesas cumu si fuéramos una colonna, esplotandu los nuesos produtos, apropiánduse de la nuesa hestoria, manipulandu los llibros de testu los nuesos fiyos y nnegándunos ata'l nome nun intentu de fuliminare pa siempres la identidá llïonesa.

Van tres días que fou el 75 Cabudannu la muerte en Colliure d'Antonio Machado y sentí deillas veces na radiu que falaban de las cellebraciones d'esi aniversariu en Segovia y Soria, falandu ca vuelta de "Campos de Castilla" y tengu de dicire qu'ensín embargu ca vuelta que sientu falare d'Antonio Machado vienen a la mia tiesta los versos darréu:

Castilla miserable,
ayer dominadora,
envuelta en sus harapos
desprecia cuanto ignora.


Tamién estos versos fonun escritos pur Machado y anque ensín conocela purque nestoncias nun esistía, paez que Machado tuviera falandu de la Xunta Castiella.

De tolos xeitos, nun nun chovióu que nun escampara asina que mientras sigamos lluchandu, sigiremos esistiendu y el nuesu país, el País Llïonés, segirá tandu vivu. Puxa'l País Llïonés!!!

No hay comentarios: