Al chegare al 10º pisu, lu primeiru ye ellexire'l restaurante y llueu, gracias a las semeyas que tienen nel esterior, decidire la clas de ramen que vas xantare, gueyare'l preciu y sacare'l tique na máquina que caún tien xunt'a la puerta y si el restaurante tá enchenu de clientes, sentase a esperare nunos banquines que tienen nel esterior.
Cumu podedes imaxinare, sacare'l tique nun ye evidente cul menú sólu en xaponés, y cun tres tamannos de ración, caún cul sou preciu desemeyau, peru un camareiru, ante la nuesa insistencia, fou ata la máquina y nos indicóu la tecla que tiníamos de tocare.
Al fondu la cucina, y a mandreicha un mostrador tamién mui típicu tantu nos restaurantes cumu nas cafeterías
Mesa cun bandeixa nel meyu onde tán los palillos pa xantare, deillas salsas y un cuencu cun guevos crudos, p'annedire al Ramen que, tandu super caliente, los cuaxa
Ramen que xantamos, taba riquísimu, anque pidimos el cuencu piquennu la cantidá fou más que suficiente
Y yá cuna andorga enchena, baixamos a la estación y marchamos p'hacia l'andén del Shinkansen. Chegamos a Nagoya nunos 35 minutos, getamos la oficina d'información pa recueyer un planu la ciudá y entrugar el camín más rápidu pa dir a l'hotel y nos atendióu una muyer xoven que falaba un inglés perfeutu. Desplicóunos perfeutamente onde taba l'hotel, la llinia metru na que tiníamos de dir y lu que costaba'l billete. Y cunas mesmas fuimos pal hotel que taba mui céntricu, nuna zona enchena d'hoteles, restaurantes y tiendas. Ensín embargu, anque l'apariencia esterior y la receición yeran bonas, l'hotel fou'l pior de los cuatru que tuvimos.
L'habitación yera mui piquenna, cul papel de las paredes marrón oscuru, lu que nun amiyoraba la sensación de piquennez y oscuridá, ensín armariu y cul aparatu l'aire acondicionau ruidosu y mui poucu efeutivu, ye dicire nun se podía parar cuna calore. A más d'eillu, na receición nun falaban una palabra d'inglés y pa rematalu, la víspera de marchare, gueyamos un escarabayu bien grande corriendu pul pasillo.
Asina que si pensades dir a Nagoya, vos recomiendu que nun fagais la reserva nel Hotel LiveMax Nagoya Sakae, en dengún casu. Y dende lluéu el preciu nun fou del mesmu nivel que los outros tres.
En Nagoya facía mueita más calor qu'en Kyoto y Tokyo asina que descansamos un bon ratu, peru cuandu salimos cuna intención de cenare, alcontramos que facía tanta ou más calore qu'al chegare, qu'había mueita xenti peru sobru tou, homes vestíos de prietu y cun pinganiellu (??) y las muyeres que taban solas llevaban las faldas estremadamente cortas y tinían autitudes, cumu poucu "equívocas". Mueitos restaurantes taban pechaos y lu que taba abiertu yeran sobru tou clubes y bares que paecían "pa homes", asina que, outra vuelta más mercamos la cena nun konbini para comprar la cena que taba xunt'al hotel y comimos na habitación.
La verdá ye que nun nos prestóu l'ambiente qu'había pula nueite, demasiaos homes cun pinganiellu, demasiaos coches prietos y grandes y demasiadas mozas xóvenes caleyandu, anque ensín embargu pul día yera un barriu mui normal.
Dalgu que tamién nos chamóu l'atención ye que mueitos restaurantes taban pechaos a las nueve la noche pesia que yera un barriu cun mueitu movimientu de xente.
No hay comentarios:
Publicar un comentario