Sigún la información que nos dieran na Oficina de Turismu, pué chegase ata'l templu pur cochellinia our pur metru peru anque'l cochellinia chega ata'l mesmu, ye más siguru dire pul metru y dende'l metru dire a pie ou en taxi.
Asina que tomamos el metru peru cumu yá entamamos conocere'l gueyu qu'eiquí tienen pa las distancias y los tiempos, cuandu chegamos a la estación más cercana'l Kinkakuji montamos nun taxi purque yá camientábamos que dire a pié cunas temperaturas d'eiquí yera tentare la suerte.
El trayeutu nos llevóu una meya houra, vamos que'l templu tá onde Cristu diera las tres voces, ou seya pa dire a pie ensín conocere'l camín.
Chegamos y yé una braeira preciosidá que s'alcuentra nel centru d'un parque enchenu d'arboles y plantas, un braeiru paraisu peru cumu to@s sabedes, ata nel paraisu hubu una sierpe y paez qu'eisas nun pueden faltare en dengún sitiu.
El Kinkakuji
Ya cuandu tábamos sacandu semeyas del templu, escubrimos que nun yéramos las únicas "giris" ente un públicu mayoritariamente xaponés (ou pulu menos asiáticu) purqu'había un grupín que falaba cuasi a gritos, vamos dandu la nota y n'hespannol.
Nun nos prestan los voceras asina qu'aniciamos el recorríu pul parque cul envís de sacare tolas semeyas que pudiéramos y chegamos a outru llugar dende'l cual tiníamos outru ángulu del Kinkakuji y paramos facenos unas semeyas "miyoradas" ou seya, cuna bandeira de Llión, que nun me digais que nun amiyora'l conxuntu.
Duas semeyas miyorandu la vista'l Pabellón
Cuandu tábamos n'eillu, pasoron los hespannoles (la mía fiya diz que yeran del "furacu prietu" y creigu que nun va escaminada, hahaha) y hubu la conversa darréu:
- Chica (cun cara de tare a las apabardas): "De donde es esa bandera"
- Chico (el voceras de l'entamu, cun aires d'enterau): "De CastillaLeón"
- Yo: "No, es de León, sólo de León"
- Chico: "Bah, ahora es CastillaLeón"
- Yo: "CastillaLeón NO existe, lleva una Y en el medio"
- Chico: "Independentistas"
- Yo: "Independentista no, lo que no soy es Unionista y mucho menos GILIPOLLAS"
Bonu, dimpués la desplicación, deíxuvos deillas semeyas qu'asperu vos presten:
Deillos "Koi" (carpa xaponesa) y una tortuga
Paez qu'atinare nel bol da bona suerte, podedes gueyare la cantidá de xente que nun lu llogra
Salimos del recintu cuasi cuandu nos eicharon, purque daba gustu tare eillí pesia la calor y tuvimos un bon ratu na parada'l cochellinia, peru cumu los que chegorun nun llevaban el nuesu camín, decidimos dir a pie ata la estación, purque yá conocíamos el camín y, al mesmu tiempu, cuna esperanza d'alcontrare un tasi peru yá sabedes, esu que se diz que los tasis nunca apaecen cuandu ties falta d'eillos tamién ye verdá en Xapón.
Asina que caminandu, caminandu, caminandu (el camín yera llargu cumu una selmana ensín pan) alcontramos un templu que nun teníamos previstu visitare, que nun taba nel mapa que tiníamos y que pulu tantu nun sabemos cumu se chama, anque nel esterior apaecía un cartel que ponía "TOMO" peru braeiramente nun sabemos si ye'l nome o se refier a outra cousa.
¿A que mesmu ensín tare ciertos del nome ye un templu bien guapu???
Bonu, pues sigimos caleyandu p'hacia'l metru y alcontramos una igrexa evanxélica que nun pudimos deixare pasar ensín faceye una semeyina, cumu diz la mía xanina, nun ye muy normal alcontrare ventanales de meyu puntu en Kyoto, nun vos paez?
Cuandu ¡¡pur fin!! chegamos a la estación del metru tábamos molidinas de tantu caleyare asina que fuimos ata la estación central de Kioto, onde al pasare pula galería comercial fuimos dare cun una riestra de Mickey Mouses cun tolas decoraciones que vos podais imaxinare. Taban eillí pa cellebrare nun m'alcuerdu qué cabudannu rellaicionau cun Disney.
Pasamos pul konbini, mercamos la cena (eiquí vos deixu las semeyas) y marchamos pa l'hotel, danos una bona ducha y metenos na banneira pa reposare.
Arroz cun bechamel, picada y salsa tomate
Fígadu en salsa cun ceboya y algas
Macarrones y patatas cun bechamel, ceboya, panceta y guevu (taba riquísimu)
Melón y sandía
1 comentario:
Con permiso, comparto. Ah! Y lo del listo....hadta en Japon hay modorros!! ;-))
Publicar un comentario