domingo, diciembre 11, 2011

Riaño: In Memoriam

Guei, cumu si d'una pena carcel se tratara, cumplense "Venticincu annos y un día" del entamu'l fin d'un valle y ochu pueblos na Montanna Llïonesa.

El más conocíu y nomau Riaño, el que ye'l símbolu tol sufrimientu qu'una supuesta democracia fizu onde nun s'atreviera facelu una ditadura peru nun podemos esqueicere qu'amás de Riaño, Anciles, Burón, Éscaro, Huelde, La Puerta, Pedrosa y Salio... esapaeciorun (a lu menos en parte cumu nel casu Burón) "nel nome'l progresu". ¿Cumu puede naide tenere las arrancadeiras de chamare "progresu" a lu que solu ye destruición? ¿Cumu puede un goviernu "socialista" esfarrapare un valle, unos pueblos, unas casas y los meyos de vida los sous habitantes pa beneficiare una compañía eleutrica?

¿Cúmu puede naide xustificare l'asesinatu d'un valle "pul bien común"? ¿Ye que los llïoneses del Valle Riannu nun tienen dreichu "al bien común"?

Nun quieru estendeme más purque solu sou quien a repetire lu mesmu y pur esu, guei, "Venticincu annos y un día" dimpues y cumu una imaxe val más que mil pallabras, vos deixu un fotomontax del REQUIEN del grupu "GANDALLA" dedicau a RIAÑO y el poema la mía collacia Lláncara titulau "Alcordanzas de Capilotes". Y si vos presta gueyare outra vuelta'l mieu poema "Venti annos" dedicau a Riaño, podedes facelu na lligazón darreu: http://ellagodelaxana.blogspot.com/2010/03/venti-anos-mas-de-venti-anos.html. Y asina mesmu recomienduvos la sigiente lligazón: http://rianovive.blogspot.com/2011/12/riano-vive-la-lucha-sigue.html

Fotomontax del REQUIEN del grupu "GANDALLA" dedicau a RIAÑO


ALCORDANZAS DE CAPILOTES

Tornu guei, y van y van yá mueitos años
Tornu guei, escarbandu feridas
que nun quieru sanar.
Acasu, un día cuandu la borrina s'adientre na memoría mía
You seya quien a esqueicer.

Aquel sábado de mayu, calteniendu la rabia, recueyí capilotes.
¿Daquíen fou la manu cobarde que arramplóu cun tolas vuesas alcordanzas?
Condenaos a vivire cun sentimientos sepultáos pulas auguas
y a marchar al destierru

Mala mai que desprecia a uno de los sous fiyos favoreciendu a outros
Madrastra de fiyos despreciaos.
Solidaria la mia tierra llïonesa
Solidarias las suas xentes.

Afogonun los suaños con cuentos y cuntas.
Outra vegada más pagamos outras deudas.
Sacrificiu inútil, nin pagu nin agradecíu.

Camudará la xente, estas son outras dóminas
más naide lu esborriará de la memoria.
Ha de chover una mariella chuvia
de mariellos capilotes pa que toos pescancien
que'l pasáu nun ta perdonáu nin esqueicíu.

Charo Martínez Domínguez. Jornadas del Caldero 2008

No hay comentarios: