Los "grandes", non pulos sous feichos sinon pula sua capacidá de confundire a los ciudadanos pa que yes sigan votandu, prometen, ca día, ensín vergonna dala, lu que nun tien intención de cumplire y cumu llevan treinta annos faciéndulu pues a sigire "faciendu caixa" y recoyendu votos cun falsas promesas.
Los "piquennos", ye dicire los que nunca nun chegonun al 5% necesariu pa tenere representanza purque sacan l'arca pa dicinos lu mal que lu facen outros y lu bien qu'eillos lu fadrían si tuvieran los nuesos votos.
La Xana tien d'almitire que ca día que pasa ye más escéutica cunos políticos, cumu siempres digu, hai esceiciones que nidiamente son ésu, ESCEICIONES, peru en xeneral "los probes" nun taban en clas (y si taban sedría cazandu gamusinos) el día que despliconun los posesivos y creyen, na sua "inocencia" que "nuesu" y "mieu" (d'eillos, nidiu) ye lu mesmu.
A más d'eillu dalgunos, que nunca nun fizun outra cousa que separtare (al pueblu, a los trabayadores, al llïonesismo, al... ecétera, ecétera, ecétera) vienen agora cul discursu la xunidá y diciendu "tos somos necesarios, tenemos de xuninos, los que tan mandandu agora son mui malos, vamos a xuninos pa eichalos y "you" (el baranda turnu) vou facelu mueitu miyor". Siempres digu que tenemos d'adeprendere de la esperiencia y you untavía tou asperandu'l políticu que diga nel País Llïonés (cumu dixeran Giuseppe Garibaldi en 1849, Theodore Roosevelt en 1897 y Winston Churchill en 1940):
"Nun tengu un res más d'ufiertare que sangre, esfuerciu, llárimas y sudor"
Hai una cousa que tenemos de tenere mui nidia tolos llïoneses nestas prósimas elleiciones: Cumu siempres vamos sintire "cantos de sirena" peru ¿sedremos tan pailanes de sigilos y deixare que finen d'esfarrapare la tierra de nuesu?
Van 28 annos que padecemos esta "Auto-NO-mía" y nesti tiempu los llïoneses (çamoranos, salamanquinos y llïoneses) gueyamos cumu ca día que pasa somos más probes, más vieyos y cun menos posibilidaes de camudare la situación. Nun pué falase de "comunidá" cuandu las desemeyanzas ente llïoneses y castiellanos, son ca día mayores, nosoutros ca vuelta más probes y eillos ca vuelta más ricos.
Vamos sintire que "nun podemos tare solos", que "tamos escontra'l progresu" y que "la xunión faz la fuercia" peru podedes tare ciertos que nunca nun van desplicavos pur quéi la provincia Logroño, costituyía na comunida autónoma más piquenna d'Hespanna, ye una las más prósperas del país (http://www.libremercado.com/2011-05-05/la-rioja-milagro-economico-con-denominacion-de-origen-1276422481/). ¿Sedrá qu'en vuelta la xunidá ye la dixebra la que faz la fuercia?
Peru lu que ye "pa nota" ye lu que llevamos sintiendu dende van 28 annos, que pur defendere la nuesa cultura ya identidá (dalgu que n'outras rexones ye dinnu d'almiración) los llïoneses somos unos cavernarios, radicales y separtatistas.
Efeutivamente, queremos separtanos d'una comunidá inventada que nun tien más de 28 annos, que ye la más insolidaria y centralista de tolas comunidaes hespannolas (y creigu que de tol "primer" mundu), que ye más grande que deillos países urupeyos y na que ca vuelta que los llïoneses pedimos dalgún sofitu pal nuesu patrimonnu rimpuenden que "cumu n'esta autonomía hai tantu patrimonnu nun chega pa toos". ¡Qué curiosu que siempres seya'l patrimonnu de nuesu el que chega tarde al repartu!
Peru lu que nin podemos, nin debemos esqueicere ye que van 28 annos que Santander y Logroño, dúas provincias de Castiella la Vieya, pudun separtase ensín problema dala de la sua rexón y que dende nestoncias las suas rentas y los sous habitantes nun deixan de medrare. ¿Pur quéi n'esos dous casos la separtación de Castiella tá siendu tan beneficiosa pa eillos? ¿Nun dicían que la xunión faz la fuercia? Y lu que ye más importante ¿pur quéi nun tuvun problemas pa separtase estas duas provincias que siempres fizun parte de Castiella, dende que Castiella esiste y ensín embargu el Pais Llïonés que nunca nun fou Castiella tien de sigire xuníu al yugu pucelanu?
Ye verdá que los partíos llïonesistas tan de capa caída, "gracias" a las sucesivas direutivas, non llïonesistas, que tuvieran dalgunos y a la pouca capacidá d'entusiasmare d'outros. Ye verdá que los representantes ¿llïonesistas? nas Cortes pucelanas tán diendu de mal en pior. Los dos cabeiros, Otero y Castresana, fizun declaraciones escontra l'autonomía lu que nos da una idega nidia del sou llïonesismo "de carteira" (braeiramente hai que tener arrancadeiras pa cobrare pur NON representare la idega pula que fonun votaos) peru esu nun quier dicire que tengamos de votare a los que, de manu, nnegan ata la nuesa esistencia cumu pueblu y el nuesu dreichu a tenere la mesma reconocencia que'l restu los pueblos d'Hespanna, nuna manifiesta nnegación de los principios la Costitución de 1978.
Y, sobru tou, nun esqueizamos que tamos n'esta "auto-NO-mía" que nos emprobez purque UCD y PSOE tuvun d'alcuerdu na sua creyación (Cuandu UCD esapaecióu la mayor parte los sous dirixentes finaron en AP, guei PP). A mas d'eillu, IU, anque n'outras autonomías, pur casu'l País Vascu, son más nacionaliegos que los propios nacionaliegos, eiquí siempres fonun "castiellanullïoneses" y qué dicire de la nueva "alquisición" del partíu de Rosa Díez, UPyD que son tan castiellanos que dicen que la propuesta de tenere un grupu socialista nas Cortes pucelanas ye ¡un insultu!. Qué poucu s'alcuerdan de cuandu la sennora Díez yera Conseyeira del Goviernu Vascu n'una coalición del sou partíu de nestoncias, el PSOE, cul PNV y qu'esta sennora fou una las más combativas pa caltenere la coalición nacionaliega.
Asina que ¡¡¡LLÏONÉS, NUN YES VOTES!!! ¡¡¡BÓTAYES!!!
Y si nun te presta votare a UPL y PAL-UL purque conoces las súas direutivas y nun te fías d'eillas nin al PREPAL purque camientas que ye un votu testimonnal, nin a UPS purque ye provincialista, nin a UPZ-ADEIZA purque nun tan nidios los sous finxos, la miyor solución ye votare nulu escribiendu na papeleta:
AUTONOMÍA PAÍS LLÏONÉS, YÁ!!!
Tamién ye una posibilidá el votu brancu peru n'esi casu, al contase cumu votu válidu, el porcentax del 5% aumenta, lu que nidiamente beneficia a PP y PSOE al facere que los partios piquennos tengan más abegosu chegare a sacar el primer representante. Nun me prestan los piquennos pur tolu que vos dixi enantias peru préstame tovia menos el bipartidismu que tratan d'imponenos.
La corrución xeneralizada, las grandes obras públicas cunas qu'esfarrapan tolu qu'alcuentran pul camín, el falare de progresu cuandu los dreichos individuales tan ca día más llimitaos pulas circustancias, la falta respetu pula natoraleza, la destruición sistemática del meyu ambiente cuna consigiente esapaición d'especies animales y vexetales... Toas esas barbaridaes tienen de finare si queremos caltener un mundu que tá morriendu pur causa los ¿humanos? Nun confundamos, caún puede y debe ponere'l sou granín de sabre pa qu'éstu furrule peru son los goviernos (de tolos niveles) los que tienen tolas posibilidaes y la mayor parte la responsabilidá.
Peru tenemos de tenere mui presente que la responsabilidá'l ciudadanu nun fina cul votu, sinon que caún tien de pensare seriamente nas promesas que fizun los políticos van cuatru annos, cuantas d'eillas cumplienun y votare d'alcuerdu cul resultau.
Una vegada más vos deixu la frax que siempres vuelve cunas elleiciones: "Prometere ata metere y una vuelta metíu... nada de lu prometíu" (Ensín dulbia dala falu del votu na urna).
No hay comentarios:
Publicar un comentario