martes, diciembre 14, 2010

León: Cuna del Parlamentarismo

Deixuvos eiquí los cuatru vídios que tán en YouTube cul documental "León Cuna del Parlamentarismo" que cumu sabedes, ye la tema "estrella" de las "celebraciones" del 1100 Cabudannu del Reinu de Llión.

Cumu nidiamente pescanciais to@s, el documental ye "pelín light" peru tá bien pa las xentes que nun tien conocencia dala de lu que'l nuesu Reinu fou na Edá Media.

Lu que ye de xulgáu de guardia ye "tola publicidá" que diorun a la emisión y, sobru tou, l'horariu en "prime time". Un llunes de puente, pula 2 de TVE y pa encima anunciau a las 12,30 horas y entamáu a las 12,15. Sedréi mal pensada peru ¿a que paez que "nun yeran partidarios" de que tuviese mueitos espeutadores?

Nun séi si la subida los vídios a YouTube son d'él ou non peru las lligazones unvióulas el mieu collaciu Tonnu. Gracias asgaya Tonnín.

Y dimpues de gueyare'l documental, conviduvos gueyare'l resume darreu feichu pur CYLTV nel que, tou cierta, alcontraréis dalgunas desemeyanzas mui suxestivas.













Y ésti ye'l vidiu que tien colgáu en YouTube la televisión de "Castiella ya Llión". Nun vos podedes perdere, a más de l'entamu, las imáxenes ente los segundos 0,24 y 0,29 y, sobru tóu, nun esqueicéis comparalas cunas mesmas imáxenes del vídiu de la 2 de televisión hespañola. Cumu podedes comprobare las imáxenes son las mesmas peru na versión "castiellanullïonesa" produzse un "espediente equis" purque ensin sabere pur quéi (inocentina que ye la Xana) camudorun los llïones de los escudos pur unas rayas mui oportunas y pur si nun fuora bastante tamién apaez "misteriosamente" un trax cun un estampáu qu'alcuerda una "cuartelada".

Nun ye qu'estas cousas surprendan a la Xana, ya tamos avezáos a sintire y gueyare manipulaciones y mentiras en tolu que tien de vere cuna nuesa hestoria, los nuesos reis, el nuesu patrimoniu, nuna palabra cuna cultura llïonesa peru... ¡¡¡sigiremos na llucha ata consigire la reconocencia y proteición de los nuesos dreichos cumu pueblu!!!



No hay comentarios: