jueves, abril 01, 2010

SANTU POTAXEIRU CHENAIME'L PUCHEIRU

El Miércoles Santu, (Marzu y 31, 2010) cumu tolos años pula Selmana Santa, La Bañeza cellebróu un autu mui especial, la procesión del Santu Potaxeiru.

Ye la procesión onde los paponines más piqueños puxan un nazarenu de 60 cms., mueitos d'eillos cul sofitu de dous papones un poucu mayores, pero ye de vere la cara felicidá que tien los guahes dimpues de puxare'l Santu Potaxeiru. Ye braeiramente indescritible.


Dimpués la procesión, la Cofradía las Angustias, reparte cuasi 3.000 raciones de potax feichu cun "grabieles", arroz, bacalau, pimentón y porretu, acompangau de pan, una pastina y una naranxa. Ye de xusticia dicire que'l potax tá deliciosu, cun bonos ingredientes y, a más d'eillu, bien feitu cun carinnu y dedicación.

Eiquí tenedes una semeya onde podedes gueyare'l cazuelón de bacalau preparáu esti annu.


Y para finare esta nueva, vos deixu'l poema pal "Potaxeiru" qu'unvióume la mia collacia Lláncara. Asperu que tóu estu vos preste.

SANTU POTAXEIRU CHENAIME'L PUCHEIRU
ENCHENAILU MÁS QUE TÁ PULA METÁ



N'estas datas de Cuaresma, tiempu de recoyimientu
Si pasas pur La Bañeza, trai cuchares y cubiertos
Nun esqueizas la escudiella ou pucheira pa metelu
El potax del Potaxeiru ye un manxar de tradición, de lu miyor lu cimeiru.

Miércoles Selmana Santa ye'l del Santu Potaxeiru
piquiñín y milagreiru a quien tolos bañezanos respetamos y queremos.
Quisióu cuantos años van dende qu'entamóu esti feichu.

Había fame pur doquier y n'esti, que ye'l mieu pueblu, quixun ponere remediu
Asina fou l'entamu, dimpúes outros lu sigienun.
La guela Anxélica pusu l'alma, bon facer y miyor xeitu.
La cofradía Las Angustias sigióu pul mesmu carreiru.
Tolos años n'esti miércoles, bañezanos y foriatos eiquí chenan los pucheiros.

¡Bien ricu que tá'l potax! Norabona quien lu fizu cun tesón y fundamentu.
Que vos preste'l bacaláu que ta melosín dafeichu.
Los garbanzos y l'arroz cun pimentón y porretu.
Un menú equilibráu a naide sentará mal, naide enanchará pur eillu.
¡Nun vengades de finolis, nin tampoucu de cismeiros!

Pues respeta la Vixilia y bendícenlu los curas pur mandamientu del cielu.
¡Xantai, xantai bañezanos, bon proveichu forasteiros!
¡Bebei, bebei llimonada! ¡”matai xudíos” por cientos!.
Nun séi you si estu sedrá pur política correutu
Las chapas cun cuidadín y las torrixas lu mesmu.
Viva la Selmana Santa, Viva'l Santu Potaxeiru.

Lláncara, Miércoles del Santu Potaxeiru 2010


Vierxe l'Amargura ou de las Llárimas
(procesiona'l mesmu día que'l Potaxeiru peru pula nueche)

No hay comentarios: