Eleiciones Urupeyas (1ª parte)

• Cumu sabedes, el prósimu domingu, Xunu y 7, los urupeyos tamos chamaos a votare los nuesos representantes nel Parlamentu Urupeyu.
  
  

Nun hai que perdere de vista que nesta ocasión lu que se decide ye una istancia supranacional anque los políticos (a lu menos los hespañoles) nun deixan d'unvianos los sous mensaxes en clave nacionaliega (hespañola).

Paez que'l ganador los comicios sedrá'l "Partiu l'astención" purque'l pueblu nun ye quien a dase cuenta que ca vegada ye más importante "Bruselas" y que tamos deixandu'l poder nas manos los "dinosaurios" la política. (Eiquí, el destinu urupeyu ye un retiru d'ouru pa los políticos asturaos pula rialidá cotidiana).

Los llïoneses tenemos un panorama difícil:

• Dengunu los "grandes" partidos (PSOE y PP) tien él mínimo deseyu de defendere la identidá llïonesa, ni siquiera de respetare las promesas feichas nas cabeiras eleiciones.
• IU cheva deillos años "encantados d'habese conocíu", faciendu profesión de fe "castiellanu-llïonesa" y falandu d'internacionalismu en Llión al tiempu que sofitan las posturas nacionaliegas n'outras partes del Estau.
• El nuevu UPyD deixó bien nidiu las cabeiras eleiciones que taban d'alcuerdu cona división autonómica autual y si teníamos dalguna dulbia, el sou númberu unu ye Sosa Wagner (rebotáu del PSOE lu mesmu que Rosa Díez) pa quien una autonomía cun menos d'ochu millones d'habitantes nun ye pusible. Sigún esti criteriu, denguna comunidá autónoma, esceutu Andalucía, sedría posible peru tou cierta que nun ye quien a dicilu pur casu en La Rioja (perfeutamente viable cun 250.000 habitantes).
• Hai d'outros partidos que tán coaligados cun nacionaliegos espansionistas castiellanos, asturianos ou gallegos qu'ante la situación autual del nuesu país tratan de colonizare, cultural y físicamente, deillas partes del nuesu territoriu.

Vraeiramente nun creigu que dengún llïonés (del Reinu de Llión) pueda sofitare dengunu d'estos partidos qu'enxamás ficionun un res pul nuesu pais sino tolo posible pa fuliminanos cumu pueblu.

¡¡¡AUTONOMÍA LLÏONESA, YA!!!

¡YE'L NUESU DREICHU!!!