miércoles, junio 03, 2009

Eleiciones Urupeyas (y 2ª parte)

En pallabras de Frai Lluis de Llïón, na Universidá de Salamanca, cumu "dicíamos ayer" nun creigu que dengún llïonés (del Reinu de Llión) pueda sofitare dengunu d'estos partidos qu'enxamás ficionun un res pul nuesu pais y pur cima tóu facen tolo posible pa fuliminanos cumu pueblu.

Na mía opinión solu tenemos tres posibilidades:

PREPAL: El Partíu Rexonalista del País Llïones apreséntase a las eleiciones ensin podere facer una campaña mediática y las súas posibilidaes d'outenere representanza son mui escasas pur nun dicire nulas. Sedría un votu románticu a un partíu LLÏONÉS y hai que valoralu cumu se merez purque pue recoyere los votos de los llïoneses de la diáspora.

COALICIÓN CANARIA: Esti partiu cheva'l numberu 3 na llista de CEU "Coalición por Europa" (el númberu 1 ye pa CIU y el númberu 2 pal PNV), sigún las cabeiras encuestas solu saldrán los representantes de CIU y PNV peru hai dalgu que los llïoneses nun debemos olvidare, cuandu'l Senáu Hespañol votóu l'Estatutu del "Este" y Llión l'unicu partíu que defendiú los intereses llïoneses fue Coalición Canaria (pa vergoña los parlamentarios llïoneses, zamoranos y salamanquinos qu'escontra la súa obligación votaron sigiendu los intereses pucelanos). Esperu seyais quienes a sentire la ironía (jajaja)

VOTU BLANCU: Si denguna posibilidá anterior vos presta, chevad el sobre ensin papeleta. Sedrá un votu blancu, amosandu d'esa maneira que somos ciudadanos responsables, que queremos participare peru que dengún políticu merez la nuesa confianza.

En cualisquier casu, deixuvos embaixu'l videu del PREPAL, merez la pena gueyalu.

No hay comentarios: