El prósimu miércoles, Febreiru y 21, cellébrase'n tol mundu'l Día Internacional de la Llingua Materna, data creyada pula UNESCO nel añu 1999 pa rememorare tolas llinguas maternas.
La Xana tá gayoleira purque, tamién esti añu, los llïoneses vamos alcordanos de la nuesa llingua y un "llionés del sur" ye dicire un salamanquinu, doutor en filoloxía, falará subre'l "Presente y futuru de la Llingua Llïonesa".
Embaxu podedes vere'l cartel y convíduvos a toos a dir a las 20,00 horas a la "Sala Región" del Istitutu Llïonés de Cultura, nel númberu 3 de la cai Santa Nonia.
2 comentarios:
"Teníamos que facere dalgu"
OPINIÓN
EMILIO GANCEDO/Diario de León,21.02.2007.
L'outru día tuve en Furniella falandu cun xente bona, xente prestousa, xente de lu meyor. Chanu, Trescastru, Guímara... muitos d'eillos viven n'El Fabeiru. Allí mesmu charramos cun mayores y cun mozos. Mui amables, amás de cosillinas y alcordanzas sobru'l antroidu contánonme que en Trescastru dicen llobu y llume , pallabras qu'en Guímara son yá lobo y lume . «¿Vedes?», dixi a quienes taban cunmiéu: «Pa sabere dalgu, non hai ná meyor qu'entrugare». Al tirar pa casa, una d'aquellas presonas tan amables dixo: «Teníamos que facere dalguna cousa eiquí... estu non tenía que desapaecer».
Esi home fizu la gran entruga. Hai que facere dalgu, sí, peru, ¿el qué? ¿quién yía'l que tien la respuesta, el que cuñoz el bon camín? Quiciabes naide. Estu yía, tien que sere, cousa y causa de toos, de toos los llïoneses cun sensibilidá. Nun sólu dalgu pasáu, de ayeri, tamién, especialmente, sobru tou, de güei y de mañana. ¿La respuesta? Andare. Falare. Y sí. Facere dalgu.
.............
Mi madre me dió a la luz en La Seca. No hablaba leonés, pero casi, casi... Tanto que yo lo entiendo casi todo, sin "aprenderlo" de nadie..
Saludos,
Alfredo
De truchas y llambrones
CUENTU
MANUEL FERRERO
TABA YOU aburríu na mio casa. Llamóme el miu amigo Pascual. Convidábame a la so casa a comer una bona sopa de trucha. Diba ya munchu tiempu tras de él pa que me deprendiera a cocinala. Decíame siempres lu mesmu, nun tien ná, nun tien ná, pero hasta'l día esi diban dos años que lo decía y nunca había concretao.
Cuando llegué, tenía un mandilón puestu. Unu de esos color vaca pinta. A un llau las fogazas duras, a otru'l tarru de pementón y sal, acullá un tríu truchas nel platu, el morteru y el barreñón.
-Vaslu faer tu, que tienes pinta tener muncha fame. Enceta la fogaza y córtala en cachos no muy menudines y échalu pa ese pucheru. Alcuérdome muy bien cuandu la mía güela aprendióme a faelas. Yera un rapaz, prestábanme yá las cacías. El cocinase lu que uno come, siempres yía meyor que ser cumu'l Llambrón de la llumbre, que taba siempres pescudando algu y al descuidu los demás.
-¿Qué yía esu'l Llambrión de la llumbre?
-¿Nun conoces la hestoria? Pues mira que foi sonada.
-Non.
-Corta un pocu mas de pan, que nun importa que sobre. Además tienes cara d'esfamiau. Resulta que nel mio pueblu, Xetinu, los rapaces, sobre tou nel antruidu, metíanse nas casas y arramplaban cola comida que veían. Esu yera cosa normal, pero un día...
-¿Qué pasó?
-Yá tá bien de pan. Nel mio pueblu había un guaje que se llamaba Franciscu y llamában-i Chiscu. Taba fecho un folgacián y tenía mas fame que'l perru'l ferreru que tragaba falispas pa comer caliente. La sua familia yera pubrísima y taba fartucu de comer lu que apañucaba polas güertas. Aparte d'esfamiau, tenía fama de gayoleru... Echa a rematina aceite a la pota y pica unos cuantos ayos. Muy finos. No prendas la llumbre entovía.
-Y que le pasaba al rapaz esi.
-Acabó llamándose'l llambrón de la llumbre. Durante un añu enteru principiaba a faltai comida a la xente. Cambiaba de sitiu los pucheros. Llevaba las fabas de Tomasa pa casa'l ti Sixtu...
......
(Publicado en Diario de León/26.02.2007)
Publicar un comentario