Alzái, alzái llïoneses!

Esti annu la Selmana Santa vien siendu estranna pula mor la pandemia coronavirus qu'asola'l mundu. La humanidá tien el sou particular Calvariu cun tolas muertes qu'asoceden estos días y anque asperamos que las cousas se normalicen, pesia la "idega pelerina" de dalgunos de treslladare dalgunas procesiones a Setiembre y 14/15, nel 2020 quedamos ensín Selmana Santa. Asperemos que l'Annu vinienti podamos cellebrala.

De tolos xeitos, guei Xueves Santu, deíxuvos darreu el mieu particular Pregón al Cristu los Balderas, Titular la mía Confrairía de las Siete Pallabras de Xuasús na Cruz. Asperu vos preste!

Alzái, alzái llïoneses

Eiquí tamos, nesta Plaza
de la ciudá de Llión
pa removere concencias,
nesti tiempu de Pasión.

Venimos daivos la nnuncia,
una vuelta y outra más
que mannana ensín tardanza
Nuesu Sinnor morirá.

Dimpués lu pregonaremos
delantre la Catedral
na Plaza Santu Sidoru
y na Casa la Poridá

Oh Xuasús de l'Agonía
Sinnor de la Llibertá
alcuérdate del tou pueblu
que guei penandu yá tá.

Vierxe nuesa del Camín,
protexe una vuelta más
los tous fiyos que te piden
trabayu y felicidá.

Patronos del Vieyu Reinu,
Santos Marcelu y Froilán
bendecinos dende'l cielu
nun nos deixéis ensín más.

Sayagu, patrón d'Hespanna
nun tenemos d'esqueicere
que fuste patrón del Reinu
enantias qu'eilla esistiere.

Chamamos al nuesu puebru
que venga venos rezare
y tamién acompanganos
pur esta guapa ciudade.

Nos sous cimeiros requeixos
nnunciaremos el supliciu
que pur salvar los sous fiyos
padeciera nel aniciu.

Vienres Santu, Vienres Santu
las tinieblas cayerán
cuandu a las tres de la tarde
Nuesu Sinnor morirá

Vienres Santu pula tarde
diremos procesionare
Confrades Siete Pallabras
pa podete adorare.

Alzái, alzái llïoneses
ye la houra la verdá
el Nuesu Sinnor los Balderas
ceu procesionará.