A Llión repítiye tantu chorizu

Nun creigu que faiga falta dengún comentariu peru paezme necesariu entrugame pur queí dengún meyu comunicación nacional se fizu ecu de las movilizaciones nesta ciudá y deixare unos númberos desplicativos:

Antiayeri lleí na prensa nacional nuevas sobru las manifestaciones del domingu, Xunu y 19, n'eillas falaban n'algún casu, mesmu de ¡¡¡duascientas presonas!!! (cantidá increyible ¿nun vos paez), ensín embargu nin siquier una pallabra sobru la manifa na ciudá de Llión cun más de 5.000 presonas, númberu mueitu mayor, falanu en comparanza, que'l de 20.000 manifestantes na ciudá de Barcelona.

Barcelona, sigún padrón de 2010, 1.619.000 habitantes y tres millones cunos municipios de l'alrodiu.
Llión, sigún el mesmu padrón tien 132.000 habitantes y 200.000 cul sou alfoz.

Asina que si namái gueyamos las capitales Llión ye menos la decima parte de Barcelona peru si tenemos en cunta las áreas metropolitanas somos 15 vueltas menos peru, ensín embargu, movilizamos a una cuarta parte d'indinados, cunu que la manifa de Llión, esqueicía nas nuevas nacionales tuvu una asistencia mui superior a las espublizadas.

Pur casu, na televisión solu falorun de la manifa de Pucela (¡qué casualidá!) cuandu sigún la prensa las manifas de Valladolí, Salamanca y Llión tuvun 5.000 presonas caúna cunu que tamién alcontramos qu'en comparanza la más grane fou la de Llión purque los habitantes de la ciudá castiellana y de las dos llïonesas, sigún padrón de 2010, son 319.000, 154.000 y 132.000 respeutivamente. Peru cumu mui bien sabedes solu lu qu'acaez nel "furacu prietu" tien dreichu a sere conocíu pul mundu y quien nun lu veya sedrá purque nun quier velu.