lunes, mayo 09, 2011

Dende'l sur del país ¡¡¡Vota llïonesista!!!

Nun séi si sabedes que'l mieu collaciu Txebe, José Benito Mateos Pascual, el tamborileru de Peñaparda y Villasrubias, na salamanquina comarca d'El Rebollal, apreséntase a las elleiciones cumu númberu ún pa las Cortes pul PREPAL.

Darréu vos deixu la presentación la sua candidatura, feicha en Palra d'El Rebollal, la variante la llingua llïonesa que se fala nesa comarca'l nuesu país. Nel sou bloge podedes alcontrare tamién la versión n'hespannol del testu:
http://candidatojb.blogspot.com/2011/05/candidatura-autonomicas-2011.html.

Txebe dice verdaes cumu punnus, conoce la hestoria y la cultura de nuesu y la defiende tolos días cul sou trabayu y la sua dedicación y solu pur ésu merez el sofitu la Xana n'esta campanna purque cun él la voz del País Llïonés taría presente en Pucela pa defendere los dreichos los llïoneses.

¡¡¡Suerte Txebe!!!


¡Saludus, paisanus!

Comu tós sabréis, ya estamus en drentru la campaña pa los votus. Los partíus, sobri tó los mayoris, mos bombardearán con futuras promesas no cumprías, con promesas ya incumprías de eleicionis que ya juerun y con mucha, mucha propaganda. Ellus puedin jadelu. Puedin ofrecelmus el sol, la luna y las estrellas... jasta'l 22 de mayu. Dispués d'esi día la cosa cambia...

Los qu'estamus en partíus chicus, los que no vivimus de la política, tenemus qu'ussal medius comu ésti, el interné, para que s'oyan las nuestras ideas y pa que la genti sepa que mos presentamus a las eleicionis. Porque estu tan cendillu, el que haiga más genti aparti de los "grandis", muchas veces no es conocíu.

¿Y qué ideas tenemus los demás? Nel mi casu es bien cendillu: la defensa la nuestra tierra, la defensa la nuestra hestoria, la defensa la nuestra cultura.

En cuantu a la defensa la nuestra tierra, los que himus vivíu juera anguna vés peru himus güeltu por amol a la tierra los nuestrus padris y agüelus, mos damus cuenta de lo que mos falta aquí, mucho más en falta si se compara con lo que hay juera. Porque la nuestra tierra sufri un abandonu que paici mentira que puéa dalsi nel sigru XXI. Y, lo que es peol, quierin jadelmus creel lo contrariu. Anque essas cossas se las crei el que quieri creélselas, porque lo idin "los suyus" (los del su partíu). Luchal contra el abandonu la nuestra tierra, y jadelu dendi otru parecel es una de las razonis polas que soy candidatu a las Cortis por el PREPAL (Partíu Regionalista el País Leonés).

En cuantu a la hestoria la nuestra tierra, lo diré craru: la provincia de Salamanca, lo mesmu que las de Zamora y León, jorman el históricu Reinu de León. Somus leonesis. Cualisquiel otru nombri sería tan "verdaéru" comu llamalmus griegus, o australianus. Salamanca tieni la su Universidá porque Alfonsu IX, Rey de León, la jidu pa que la genti nueva del Reinu de León no tuviesi que ilsi pa estudial. El nuestru Reinu de León jué el primeru en celebral Cortis en tóa Uropa, Cortis andi, pol primera vés, había representantis de las ciudadis. Cortis enas que, comu ciudadis del Reinu de León, estaban Ciarrodrigu y Salamanca,... No quieru estendelmi ena hestoria. Peru me da pena, y a la mesma vés rabia, el vel cómu s'intenta escondel esta realidá hestórica, cómu se mos quieri jadel creel que somus otra cosa, cómu se quieri jadel creel a la genti que algu que s'inventó jadi ná ha esistíu siempri. Y esu se jadi con dineru púbricu, con el dineru de tós, mientris que cuandu se pidi pa carreteras y sanidá nunca lo hay... Yo no puéu quedalmi de brazus crudáus viendu cómu desprecian y ningunean la hestoria de la nuestra tierra. Esa es otra de las razonis polas que soy candidatu a las Cortis por el PREPAL (Partíu Regionalista el País Leonés), el únicu partíu que, hogañu, lucha contra el olvíu hestórico la nuestra tierra, sin cambiar el discursu sigún de sopre el airi. Hogañu, es el únicu partíu que defiendi que Salamanca, Zamora y León, el hestóricu Reinu de León, tenga autonomía propia, autonomía a la que tenemus derechu pol mé el artículu 2 de la Costitución.

La nuestra cultura es comu el nuestru carné: es lo que mos idi quienis somus comu persona, comu pueblu. Comu ya sabréis (y si no, ya vos lo digu yo) tocu varius estrumentus tradicionalis (entri ellus, panderu cuadráu, gaita y tamboril), estoy en asociacionis culturalis, grupus, defiendu la palra d'El Rebollal (el mó y manera que tenemus n'El Rebollal de palral leonés),... Y, comu no pué sel menus, seguiré defendiéndolas siempri, comu señas d'identidá que son de la nuestra tierra, comu herencia los nuestrus antepasáus. Y, pol esu mesmu, esti escritu de presentación va a ser en dos lenguas, en castellanu y en la palra d'El Rebollal. Porque a mi no me da vergüenza ussal la lengua los mis antepasáus, porque hay que predical con el ejempru y porque, si no, no sería yo.

Los que me conocéis sabéis de sobra que la defensa la nuestra tierra, la defensa la nuestra hestoria y la defensa la nuestra cultura es algu que me tomu mú en seriu. Otra más de las razonis polas que presentu la mi candidatura a las Cortis por el PREPAL (Partíu Regionalista el País Leonés): porque siempri ha defendíu la nuestra hestoria, la nuestra cultura y la nuestra tierra con seriedá, sin dependel de naidi, conas ideas craras.

Pol tó esu, el día 22 vos píu el votu pa'l PREPAL (Partíu Regionalista el País Leonés). Pola nuestra hestoria. Pola nuestra cultura. Pola nuestra genti.

1 comentario:

TXEBE dijo...

Gracias, Alicia.

Jadremus tó'l ruíu que poamus. No mos van a afechal la boca :-)