viernes, noviembre 26, 2010

Elleiciones en Catalunna: ¡¡Caún sedrá lu que quiera sere!!

Van deillos días que la mía collacia María Loïsa, catalana de sangre, de tradición y d’elleición, unvioume esti vídeu qu’ata guei nun tuvi tiempu de gueyare. El vídiu tien que vere cunas elleiciones catalanes del prósimu domingu, cousa que me face alcordare d’unas frases del President Montilla nas que falaba escontra un nuevu tripartitu tres las elleiciones ensin vergonna dala pul feichu que lleva gobernandu “en tripartitu” cuatro annos. Tá nidiu que, pa los políticos, tóu val pur “un punnau de votos” peru ¿val tamién pa nos?

Lu primeiru que tengu de dicire ye que nel casu d’outras rexones hespannolas, alministrativamente falandu, la Xana tará siempres d’alcuerdu cuna postura mayoritaria los naturales d’esas rexones. Bastante tenemos los llïoneses cunos problemas de nuesu pa metenos defendere posturas n’outras partes.

Lu segundu ye que nun tengu dulbias que dalguna xentí nun tará d’alcuerdu cuna postura, tantu de María Loïsa cumu d’outros catalanes que nun se sienten hespannoles peru tengu de dicire que, pa mín, esa ye la grandeza la democracia que xentes de pueblos desemeyaos pueden falare y compartire gustos y amistá, anque tengan opiniones, idegas ya sentimientos desemeyaos.

A más d’eillu, la Xana que, cumu creigu sabedes, vivíu mueitu tiempo nel País Vascu, tá cansa de sintir dicire a los políticos, enchenánduse la bouca cunas pallabras: “En ausencia de violencia se puede hablar de todo”. Y la Xana que ye “mui inocente”, entrugábase entoncias ya entrúgase guei: Si en Cataluña nun hai violencia ¿onde ta’l problema pa falare “de tou”?

Peme que los políticos nunca nun sintieron aqueillu de “cárgalas el diañu” y esu ye lu qu’acaez cunas pallabras nesti casu. Si nun tamos d’alcuerdu cuna independencia, nun tenemos de dicire que “se pué falare de tou” peru, si se diz, sedrá purque puede facese ¿non?

Tamién m’alcuerdu d’outra frax: “los navarros serán lo que quieran ser”. Y eiquí entrúgume, ¿qué pué pasare si, nun momento la hestoria, los navarros nun quieren ser hespannoles? Sigirían siendo “lu que quieran sere ou de repente camudará tamién la situación?

Esta tema llevame a facere outra reflesión ¿Sedrá que pa esta xenti’l mieu ye’l camín pa consigire los oxetivos los pueblos? ¿Sedrá pusible que los políticos nun seyan quienes a pescanciare que lu que tán faciendu ye dicire a la xentí: “Solu embaixu menazas graves podedes outenire lu que deseyais” y esi, sinnores, nun pué sere’l camín enxamás asina que nun den mensaxes peligrosos, qu’esas cousas sabemos cumu entaman peru enxamas sabemos cumu finan.

En tóu casu, la Xana creye qu’en democracia tol mundiu tien el dreichu de defendere las súas idegas, pulu que vos deixa’l prometíu vídiu purque solu si respetamos al próximu podemos desixire respetu pa nos y pa las idegas de nuesu:

2 comentarios:

Mº Lluïsa dijo...

Gràcies Llícia,
M'han agradat molt els teus comentaris de presentació introduïnt el vidéu.
Demà dia 28 de novembre, ens toca a tots manifestar-nos votant.
I continuarem parlant com sempre, perque "parlant la gent s'enten".
Salutacions,
Mª Lluïsa Paytubí i Aparicio.
Barcelona

Xana dijo...

Gracias a tí pur unviare'l vídiu, Mª Lluïsa y mueita suerte mannana nas elleiciones.

Cumu bien dices "falandu entiéndese la xenti" peru hai deillas presonas que creyen qu'esu de "falare" ye que to@s yes demos la razón.

Beisines dendi'l Reinu de Llión