Cursos d'Hibiernu: Indumentaria ya hestoria

Dende la Conceyería de Cultura Llïonesa del Conceyu de Llión, unvíanme l'información darréu subre los Cursos d'Hibiernu qu'escomenzarán la selmana que vien. Debido a las poucas plazas ufiertadas, ye precisu confirmare cuantu antes la matrícula'l cursu.

Pa más información contautare cul teléfonu 987 344 383 (Miguel Escanciano) dende las 9,00 ata las 14,00 horas

CURSOS D’ HIBIERNU 2008

BAILLE, INDUMENTARIA Y COSTUMES NEL VALLE'L BERNESGA

Ponente: JAVIER EMPERADOR
Duración: 10 horas
Datas: Avientu y 9, 10, 16 y 17, 2008
Horariu: De 19,00 a 21,00 horas
Numberu de Plazas: 12
Preciu: 20€ empadronaos / 30€ non empadronaos
Iscrición y reserva: Palaciu Don Gutierre

FRANCISCO JAVIER EMPERADOR MARCOS
Naz en Vegellina d'Orbigu, en xineiru y 12, 1962, aú reside ata los 10 años en que se trasllada a vivir a Llión.
Dende bien mozu vencéyase al mundu del folclore Llïonés formandu parte primeiru del grupu de Couros y Dancias del Ministeriu de Cultura y postreiramente cofundador del Grupu de Dancias Reinu de Llión.
Venceyáu dende siempres a asociaciones de caráuter etnográficu: Parva y Sosiega, Orfeón Llïonés, Grupu de baille tradicional Tenada, etc.
Ye profesor de pianu y téunicu superior n'arte Testil.
Coleicionista d'indumentaria tradicional llïonesa, parte de la sua coleición forma parte del Museyu Nacional d'Antropoloxía y del Museyu Etnográficu Provincial de Llión.
Rializóu importantes esposiciones de caráuter etnográficu: Portu, Palencia, Madrí, Llisbona, Salamanca, Llión, etc., asina cumu programas divulgativos de folclore en radiu y televisión. Davezu rializara cursos pa universitarios, aulas de folclore, espublizaciones y artículos de prensa, grabaciones musicales, etc.

BAILLE, INDUMENTARIA Y COSTUMES NEL VALLE'L BERNESGA
Esti cursu tenta d'averanos a la conocencia de las manifestaciones etnográficas y vezos d'esti valle recoyidas pur Javier Emperador nel trascursu de los últimos 25 años.
El desenrollu efeutuarase al traviés d'un estudiu pur Conceyos: Villamanín, Poula de Gordón y Cuadros, nos cualos vedremos pueblu a pueblu las manifestaciones, la evolución y las diferencias tantu nos aspeutos d'indumentaria cumu nos de bailles ya istrumentos, utilizandu un soporte d'imaxes y soníu grabaos en trabayos de campo.

PODER, GOVIERNU Y ALMINISTRACIÓN LLOCAL NEL REINU DE LLIÓN, SIEGLOS XV-XIX

Ponente: LAUREANO RUBIO
Duración: 15 horas
Datas: Avientu y 10, 11, 15, 17 y 18, 2008
Horario: De 19,00 a 22,00 horas
Numberu de Plazas: 15
Preciu: 20€ empadronaos / 30€ non empadronaos
Iscrición y reserva: Palaciu Don Gutierre

LAUREANO MANUEL RUBIO PÉREZ
Natural de Fresnu la Valduerna. Catedráticu d'Historia Moderna de la U.L.E. Llicenciáu y Doutor n'Historia Moderna pula Universidá d'Uviéu.
Ingresa na universidá de Llión en 1981 cumu profesor contratáu. Depuéis de deillos años de profesor Titular de Historia Moderna acede en 1994 a la cátedra d'Historia Moderna de la U.L.E.
INVESTIGACIÓN:
Dende la sua tesis doutoral espublizada pula U.L.E. baixu'l títulu La Bañeza y su Tierra, 1650-1850 y centrada na problemática social y económica del mundu rural, desenrollara diferentes llínias y proyeutos d'investigación que dieran cumu resultáu más d'una dolcena de llibros y un destacáu númberu d'artículos en revistas especializadas, asina cumu una amplia participación en congresos nacionales y estranxeiros. Una d'estas llínias d'investigación centrouse na problemática política de la provincia llïonesa dende la Edá Media ata'l sieglu XIX y la postreira espublización del llibru el Sistema político concejil de la provincia de León durante la Edad Moderna. N'esi mismu orde, outros proyeutos rellacionaos cuna burgesía maragata, cunos siñoríos llïoneses ou cuna problemática social y económica de la provincia llïonesa y del Reinu de Llión, sirvienun d'encontu a las correspondientes espublizaciones de referencia.

PODER, GOVIERNU Y ALMINISTRACIÓN LLOCAL NEL REINU DE LLIÓN, SIEGLOS XV-XIX
L'oxetivu cimeiru del cursu ye facer analís y valorar el marcu istitucional y las rellaciones de poder que s'establecieran y calteñeran na provincia llïonesa dende la Edá Media, ye dicire dende la configuración definitiva del Reinu de Llión, ata las reformas del sieglu XIX y la istauración de las istituciones d'anguañu. N'esti marcu y problemática analizaranse ente outras cuestiones rellacionadas cuna alministración llocal del mundu rual y urbán, el sistema conceyil y el pesu del Dreichu Consuetudinariu Llïonés, el réxime comunal y el coleutivismu social y económicu, asina cumu'l propiu réxime siñorial en tornu al que se configura un modelu políticu y social llïonés bien diferente del restu de territorios de la corona castellana.