viernes, agosto 15, 2008

Breizh dieub-Bretaña llibre

Copiuvos un artículu qu'alcontréi en "Les Noticies" robráu pur Xune Elipe subre la situación d'outra llingua minorizada, la bretona:

Comentaba esti día lo prestoso de venir de nuevo a Bretaña y alcontrase con qu'una de les sos llingües, la d'orixe célticu, el bretón, ta llogrando una visibilidá y una presencia na sociedá realmente bultable. L'otru idioma propiu del país, el galó, de calter llatinu, según me cuenten nun tien un desarrollu tan grande. Fálase ésti últimu nuna zona llendada al noroeste de la tamién llamada Península Armoricana, sicasí pudimos ver della señalización y cartelería nél, amás de propaganda d'actos y eventos (conciertos, manifestaciones...) en trillingüe (breton, galó y francés).

La presencia de la llingua bretona nel festival y na sociedá contrasta cola cásique nula influencia que'l nacionalismu bretón tien na política d'esta tierra. Estos dies, por más que busco, nun atopo los clásicos puestos de partíos políticos que n'otres ocasiones solíen andar per equí, y ye que siempre presta dar un poquiñín la parpayuela colos "collacios" bretones. Ehí taben, otros años, la xente del Engam (independentistes d'izquierda), bastante activos y en primera llinia, o los del POBL (esta palabra significa "pueblu" en bretón, pero tamién son les sigles de Partí pour l'Organization d'une Bretagne Libre), de calter federalista. El movimientu nacionalista bretón tien una hestoria y unes circunstancies mui particulares; con más de cien años arrecostines pasó por momentos verdaderamente, vamos dicir, escabrosos, como cuando una parte d'él (un sector del hestóricu Partíu Nacionalista Bretón) apoyó a los nazis durante la ocupación, convirtiéndose en collaboracionistes, col enfotu de qu'asina llograríen la independencia. Esti fechu estigmatizó de tala manera a los nacionalistes que tardaríen tiempu en "llevantar cabeza", tanto ye asina qu'hasta la "gwenn a du" ("blanca y negra", la bandera bretona) tuvo ensin ser "rehabilitada" munchos años. Nun sería hasta la década de los setenta cuando unes xeneraciones nueves, yá nun marcaes polo socedío durante la II Guerra Mundial, garraríen el testigu, esta vez dende la izquierda y ensin nengún complexu. Pero nuevamente un sector empobinaría per un camín cuando menos discutible: la "violencia política", "llucha armada", o llamémoslo como queramos, foi de la mano del FLNB (Front de Liberation Nationale de Bretagne), que con acciones non cruentes tuvo activu bien d'años, tiempu depués la "tentación violenta" apaecería de nuevo cola fundación del ARB (Armée Revolutionaire Breton), con menor incidencia que'l primeru hasta la so practicamente desapaición. Anguaño la única organización política con cierta presencia institucional tiénla la UDB (Unión Democràtique Bretonne), un partíu moderáu de tendencia autonomista y socialdemócrata. Inda asina los bretones tienen un sentimientu bien grande de pertenencia a una comunidá humana diferenciada, con una personalidá fuerte, pero onde, de momentu, ésta nun cuenta con una espresión politica. ¿A qué vos suena esto?

Per otru llau ayeri decidimos "tastiar" l'ambiente musical del festival más qu'asistir a dalgún de los conciertos programaos pola organización. Caleyar peles cais d'An Oriant estos díes, peatonalizaes temporalmente munches d'elles, ye entrar nun universu sonoru onden conflúinn les más variaes propuestes. Nos pequeños escenarios montaos pa la ocasión tienes la oportunidá de ver a grupos con nomes como Arran, Bran o Kroachent qu'intenten facese un sitiu na bayurosa escena bretona. El respiru que nos dio la lluvia permitiónos degustar una pinta de cerveza negra mentanto los sentimos ente'l xaréu de la xente. Otra oportunidá de descubrir bandes desconocíes, pero la mayoría con una calidá sobresaliente, son les distintes carpes instalaes con motivu del festival, ente elles el "Pavillion Acadien", onde esta comunidá francófona de Canadá ufierta, quiciaves, la meyor programación alternativa. La suya ye una música vibrante, dinámica y participativa, fecha arremente pal baille y la diversión, y que ta llogrando'l reconocimientu del públicu en viendo los llenazos que tolos díes consiguen en cuantes suena la primer nota. P'acabar la nueche una visita hasta l'Espace Bretagne onde un cuartetu bretón de nome Arvest (teclaos, guitarra acústica y dos voces) ficieron les delicies de los asistentes con temes qu'afalaben a participar nes milenta dances propies del folklor d'esta tierra; una delicia pa sentir o, si yes un valiente, garrate pelos deos y axuntate a les espirales infinites d'homes y muyeres de toles edaes que, a la mínima, entamen un corru. Kénavo.

No hay comentarios: