Hestorias d'una pepona

Bonas a tol mundiu. Tamos en branu y anque'l tiempu nun ye vraeiramente braniegu, nótase nas poucas nuevas qu'hai en tolos blogs nestos tiempos. Lu mesmu que nos periódicos, arradiu y televisión. Peru de tantu en tantu daquien escribe su "articulín" con fortuna diversa.

La Xana, dimpues de pasare vacancias nel sur del País, ye dicire'n Salamanca, alcontróuse dalguna nuevas que le ficieron cavilare. Pur eillu guei va falaivos de ¡¡¡moñecas.!!!

Fai alreol 50 años, taba chegando'l fin de las "Maricris". Yeran "peponas", moñecas de cartón pintau, que taban en tolas xugueterías peru comu vos digu, el sou fin taba prósimu purque'l "progresu hespañol" nos años 50/60, fizu que s'emplegasen outros materiales miyores y los "Reis Magos" entamaron a mercare muñecas de "Gama" y "Famosa" deixando las peponas "Maricris" nel olvidu.

Peru, nestos cabeiros tiempos, atoupei una "Maricris" que "solu mira'l futuru", que nun-y prestan las nuesas cellebraciones ni la nuesa llingua, que fala ensin sabere lu que diz y que ye "la voz del sou amu" pa falare d'intres que nun conosce y pa "dainos lluz" a los probes llïoneses inorantes purque nun tamos d'alcuerdu cun eilla, tan "universal" que nun ye capaz d'entendenos tan "provincianos" cumu somos... (De xuru qu'eilla nun entruga a naide ¿sedrá pur eillu que dalguna vegadas las suas nuevas nun tien na que vere cona rialidá los feichos?)

Lu que nun sou a pescanciare ye cumu daquien tan "superior intelleutualmente" pué tare eiquí, trabayandu nuna ciudá cumu la nuesa, nun mui grande y, por cima de tóu ensin hestoria denguna y chena de pailanes... Ou ¿sedrá quiciabes que ni somos tan pailanes nosoutros ni eilla ye tan "perfeuta"?

Ufffffffff, ye abegosu sere tan "supermegaguay" (xurutelu pur Snoopy Maricris) y soportare tantu provincianu o, miyor entavía, tantu "cavernario" cumu chamóunos, fai un añu, el "Juanvi"

¡Ai Maricrís, Maricrís, que nel momentu mesmu que rascamos la pintura nos alcontramos col cartón de la pepona! ¡Doite un conseyu de collacia, cuidadín cona "mala baba" que ye mui mala pal cartón!