viernes, junio 08, 2007

Dimpues de las elleiciones....

Fai dalgunos dias que pur falta tiempu nun escribu un res peru ye houra de falare sobru las elleiciones.

Comu ye normal nestas datas, tolos partíos yeran ganaores. El PSOE purque sacóu más conceyeirus que'l PP na ciudá de Llión, el PP purque tien mayoría asoluta na provincia de Llión y l'UPL purque tien la chave tantu na ciudá de Llión comu'n mueitus conceyos pur tola provincia y caltien dos procuradores nas Cortes "colonialistas".

Agora falandu seriamente, el PSOE chora purque'l sou "llïonesismu" nun foi radical asgaya pa ganare'l goviernu la Diputación. (Hai que tenere arrancadeiras nun choran pula nuesa identidá ou pula nuesa economia, NON, choran pulos suos resultaos elleutorales)

Nel PP, dimpues las xornadas d'infartu nas que pasóu del empate a la mayoría asoluta, tan nel intre de sacase los gueyos unos a outros, nuna gerra ente la presidenta provincial del partíu (que parez tare "sola ante el peligro") y dalgunos alcaldes dirixios pul de Coyanza. Vraeiramente dalgunas vitorias tien tol sabor de la derrota.

Pula sua parte, l'UPL ta desfueyando la margarida, dimpués d'oyire los cantos sirena de los outros dos partíos. Creigu qu'a la fin tarán nun goviernu cul PSOE na ciudá de Llión. Nestos momentos ye importante facere llïonesismu na nuesa ciudá y la miyor manera de facelu ye conos medios del goviernu. Peru ye precisu que seyan mui desixentes nas suas demandas y subre tóu nos resultaos. Nun podemos permitinos outros cuatru años d'incumprimientos y tolos llïoneses tien que sabere que la llucha pula autonomía sedrá'l oxetíu cimeiru.

Tamién tien que sere mui desixentes conos medios de comunicación. Ye precisu que tol mundiu sepa que'l llïonesismu facenlu eillos y tien que facese diferenciar de los partíos sucursalistas.

¡Ah! cuasi finu'l mieu escritu olvidandu'l vraeiru protagonista d'estas elleiciones, "Pelines" que'l mesmu día 27, pula mañana, falaba de tenere 4 ou 5 conceyeiros na ciudá de Llión peru pula nueitu nun tuvo las arrancadeiras de rimpuendere a los periodistas y deixóu solina a Covadonga.
Paezme que naide le dixu qu'hai que sere un siñor nos buenos y nos malos intres de la vía peru... onde nun hai nun pue sacase. En cualisquier casu, esti añu Samartinu foi nel mes de Mayu.

Y la prósima selmana.... falaremos del goviernu!!!

No hay comentarios: