¿Pur quéi estudiare llïonés?

Ye mui cenciellu, purque ye la llingua de nuesu, purque dalgunas cousas compriendemoslas sin que naide expliquenuslas, purque cada llingua tien unas estruturas diferentes que corresponden a la forma de pensare del pueblu que la fala y las estruturas de la llingua llïonesa correspondense con la nuesa manera de pensare y razonare.

Nel nuesu cas, mesmu si adeprendimos l'hespañol de guajes, hai munchas pallabras que son llïonesas y nun conoscemos comu dicilas en castellán y lo mesmu pue dicise del modu d'emplegar los verbos. Cualisquiera qu'oiga falare nel Reinu de Llión pue notare que nousoutros usamos normalmente'l presente, l'indefiniu y el futuru, comu ye normal na nuesa llingua.

Aqueillas pallabrinas que nos dician las nuesas guelas cuando piquiñines díbamos pa la camina: "Vamos guajín a cochare con guela" y que, ensin sabelu, adeprendíanus a falare'n llïonés.

Tantas y tantas pallabras llïonesas que siempres creyimos yeran castiellanas peru qu'en cuanti pasábamos el Pisuerga, denguna persona entendía, nun yera un chapurreau sin sentíu, yera la llingua mas antiga de la península: la nuesa llingua, el llïonés.

Pur esu mesmu, purque los nuesos guelos nun yeran iñorantes, purque nos somos llïoneses y tamos orgullosos d'eillo y purque nun deixaremos morire la nuesa llingua tan prestosina, vamos a falare'n llïonés. ¡Deprenderemos lu que nun sepamos! ¡Falaremos y escribiremos na nuesa llingua! ¡Purque ye'l nuesu dreichu!

¡YA, YA, YA, OFICIALIDÁ!!!