lunes, junio 19, 2017

Reinu de Llión: Bierzu'l Parlamentarismu

Tuvu de vinire un hestoriador australianu a "escubrinos" que'l Bierzu'l Parlamentarismu yera Llión purque mesmu deillos hestoriadores sedicentemente llïoneses, escontra la rezón, escontra la documentación y escontra'l sentíu común sigen guei dia espardiendu dulbias ensín base dala.

Tien de sere la Enciclupedia Británica la que venga aclarïanos que son los hestoriadores hespannoles los que, getandu escusas y desplicaciones pa salvare la cara los separtatistas castiellanos, amuesan el reinu de Llión medieval cumu un Estáu arcaizante, de tipu bizantinu, dimpuestu siempres a tratare cunos musulmanes, esqueiciendu la rïalidá de que'l gran impulsu na Reconquista partiera siempres de Llión mientras el Condáu de Castiella aproveitaba la lluita escontra l'infiel p'atacare al Reinu de Llión ya ensín tenere en cunta que las Lleis escritas amuesan una modernidá y una seguridá pa los ciudadanos mui superior a la costumbre.

Dimpués de gueyare una y outra vuelta que tienen de venire los británicos, poucu sospechosos de parcialidá p'hacia'l Reinu de Llión, a ponere los puntos sobru las ies nu que cinca la hestoria ya'l dreichu llïoneses escontra lu que facen la mayoría los hestoriadores y los poderes públicos hespannoles, la Xana sigi entrugánduse: Sedrá que pal Goviernu central, pa los políticos y pa los hestoriadores, los llïoneses nun somos hespannoles?? Purque, vistu lu vistu, si toos somos hespannoles d'aú yes vien l'interés n'ocultare tolu llïonés ou apresentalu cumu castiellán?

Pur eillu ye de gran interés la conocencia d'estos documentales y anque dalgunas las suas afirmaciones nun seyan totalmente acordes cuna rïalidá lu asocedíu, al tiempu que s'eicha en falta una bona referencia al Fueru de Llión proclamáu pul nuesu rei Fonsu V de Llión "El Noble" ou "El de los Bonos Fueros" nos annos 1017 y 1020, paga la pena de gueyalu cun atención na seguranza que mueitos sentirán cousas que nunca naide yes adeprendiera sobru la gloriosa hestoria'l Reinu de Llión, el más poderoso y adelantáu al sou tiempu na Hispania Medieval.

Argullosos de sere sólu llïoneses, ensín más peru sobru tou ensín menos!!!

Espublizáu en youtube n'Avientu y 30, 2013

Nel sou afamáu llibru "Life and death of democracy" el profesor Keane de la Universidá de Westminster deixa bien nidiu que la democracia representativa nun nnaciera n'Inglaterra sinon nas Cortes Llïonesas de 1188. L'escritor Juan Pedro Aparicio rellata'l manu suceso, pa lluéu amosare, dende una pespeutiva sintetizaora de dous mil annos d'hestoria, los raigannos d'un reino, cuyos súditos prauticaban la democracia direuta nos sous Conceyos Abiertos.

No hay comentarios: