Nel furacu prietu - "Somos Así" - Mayu y 30, 2011

 Cara a Cara nel programa "Somos Así" sobru la idega de "comunidá" - Miercoles, Marzu y 30, 2011 - Minuto 0:10:35 - 0:43:17

Cumu creigu sabedes, va tiempu (aprosimadamente dende que la Xunta Castiella entamóu falare del "centro del centro de Castilla") que la Xana diz que "nel centru'l centru" hai un "furacu prietu" que xanta tolu que'l restu l'autonomía produz. Tou esapaez nel centru'l centru "la fregadeira", ye dicire nel desaugue.

Bonu pues el cabeiru miércoles, Marzu y 30, la Xana tuvu de dire al "furacu prietu" participare xuntu cun Manuel Sánchez y Pablo Yañez, (ésti diba pur ANLL peru tamién tá metíu en política, cousa que nun tenía mueitu interés n'espublizare) nun debate na 7 de CYL TV. Deixuvos eiquí la grabación feicha pula tele p'aqueillos que nun pudistis gueyalu nel momentu, ou pa los que vos preste gueyalu outra vuelta.

Manuel y you fuimos xuntos pa defendere la reconocencia los dreichos de salamanquinos, çamoranos y llïoneses a la nuesa autonomía. Lu que chamóu l'atención de la Xana fou'l feichu que l'única presona qu'alcontraran pa defendere l'enxendru fuera'l Secretariu la Federación Norte de Ciudadanos-Partido de la Ciudadanía (nacíu cumu Ciutadans) y que ye'l Presidente d'ANLL (Asociación Nacional por la Libertad Lingüística) nome que ye l'amuesa perfeuta de lu que ye la publicidá engannosa purque falandu de llibertá l'unicu que tan getandu ye la esclusión de tolas llinguas minoritarias y minorizadas d'Hespanna purque, sigún eillos, los sous falantes queremos imponelas al castiellán que tá "en pelligru" pula mor d'esa imposición.

En cualisquier casu, creigu que taría bien que daquién informara a ANLL y al sou Presidente del enllaz del DRAE. Nun ye precisu que merquen, nestos tiempos de crisis, un dicionariu la llingua, peru taría bien que nuna asociación que tien nel sou nome la pallabra "lingüística" tuvieran una bona conocencia la llingua que dicen defendere. El mal usu las pallabras de cualisquiera llingua y l'espreciu d'outras desemeyadas de la (ou las) de nuesu, amuesa cenciellamente una falta respetu p'hacia tolas llinguas.

Paez que, mesmu tandu en Pucela, nun ye mui cenciellu defendere l'enxendru comunidá más grande, centralizada ya insolidaria purque sigún nos dixeron, convidaron a outra asociación que nun quisu asistire.

Nel vídiu tá tola programa peru'l debate apaez ente los minutos 0.10.32 y 0.43.20

Cuasi esqueizu dicivos, cumu la programa se faz en Pucela, pa dire dende Llión hai cuatru horas de viax (ente dire y vinire) cul consigienti gastu gasoil. A más d'eillu, cumu tiníamos de tare na tele a las 16,30, pa nun dire cul bocau na bouca, salimos sobru las 12,00 y xantamos en Pucela. Nin que dicire tien que naide entrugóu pulos gastos qu'esu supón. Los que viven na "capital del mundu mundial" (Pucela) pueden dire nel busi, "la plebe" ou seya los que vivimos nel restu l'auto-NO-mía, pagamos tolos gastos que podamos tenere, a más de ponere cuatru houras del nuesu tiempu pal desplazamientu asina que... ¡¡¡Viva la llibertá, la igualdá y... la fraternidá!!! (Llástima nun ponere en prautica outros "llogros" de la Revolución Gabacha, hahaha)

¡¡¡Que vos preste'l debate!!!