El tunel del tiempu: Ramalazos ditatoriales nel sieglu XXI

Llee la Xana pur casualidá un entrada qu'escolingóu n'Avientu y 3, 2006, ye dicire van un pouquín más de cuatru annos, cuandu tamién tábamos nun períodu pre-eleutoral y queda glisada purque paez que lu escribiera ayeri mesmu. Vamos, que nun momentu, sou ¡¡¡cuatru annos más nueva!!!

Non si al final tendremos de tayes agradecí@s, tantu se "desvelan" pur nosoutros que nos facen pensare que'l tiempu nun pasóu y que somos más xóvenes. 

Ye mui curiosu vere los ramalazos ditatoriales que tien dalgunos pailanes nel PP y PSOE (y tamién en IU anque eillos nun tán nas istituciones)

Lu primeiru qu'hai que yes dicire ye qu'esta comunidá ye anticostitucional purque tá feicha escontra los ciudadanos llïoneses y escontra los artículos 2 y 14 de la Costitución. Nesti casu, mesmu que pasen 100 annos sigirá siendu anticostitucional, nosoutros sigiremos glayandu pula nuesa llibertá y enxamás nun podrá tornase costitucional pul pasu'l tiempu.

Lu segundu ye que la sua fixación de que la mapa autonómica tá pechada ye, cenciellamente, lu qu'eillos quieren que creigamos, que nun podemos facere ná de ná. Esa ye la sua idega peru nun ye la nuesa, nestoncias, mesmu si nun tan gayoleiros pur eillu, nosoutros sigiremos na nuesa llucha ata algamare l'autonomía.

Lu terceiru ye que to@s esos políticos "sucursalistas" y pesebreiros tienen d'adeprendere que somos los llïoneses (zamoranos, salamanquinos y llïoneses) los que tenemos de dicire si la cousa ta pechada ou non y cumu nun tamos d'alcuerdu sigiremos dánduyes la turra lu mesmu agora qu'enantias.

El xueves pasáu, el portavoz socialista na Diputación dixu: "El Estatuto está aprobado, es lo que hay, y no voy a perder un solo minuto en discutir sobre la autonomía de León, lo que a la gente le interesa es tener trabajo y vivir bien y el resto no le preocupa".

¿Vosoutros sabedes en quien penséi n'aquel momentu? Nun señor baixu, fuerte y cun bigote que yera "xeneralísimu". ¿Pescanciades de quien falu? Xustu, de Franco. El tamién dicía que la xente nun taba prïocupada pula llibertá y la democracia y que tou taba "atado y bien atado" peru la rialidá ye cazurra (cumu nos, hehehe) y amosóu que las cousas nun taban tan atadinas cumu él creyía y que la llibertá yera mui importante pa la sociedá. ¿Pur quéi lu tendran d'exemplu estos "sociu-listos? ¿Sedrá posible que creigan que tamos d'alcuerdu en que nos deixen ensín nome, ensín llingua, ensín cultura, ensín hestoria y ensín identidá?

Y tovía unas entruginas que me tienen cavilandu tolas nueites:

¿Pur quéi un partíu que dizse socialista fala tol tiempu de solidaridá nas nuesas provincias, que nestos momentos tán nos cabeiros puestos dientru las provincias hespannolas, y nun face lu mesmu nas provincias que tan nos primeiros puestos?

¿Pur quéi nun ye solidariu tol restu d'Hespaña cun nosoutros?

¿Sedrá que pa eillos los llïoneses nun somos hespannoles poru nun tenemos dreichu a l'autonomía de nuesu cumu los outros?

Quiciabes lu que ZP y sus "rapaces" tienen de sentire'l glayíu de "Somos León y somos NACIÓN" nestoncias ye posible que piense qu'esistimos purque paez que solu los pueblos que s'apresentan cumu nación tienen importancia y dreichos pal "braeiru castiellanu y llïonés", cumu él mesmu diz en Pucela. (Quieru deixar bien nidiu que nun tengu un res escontra los pueblos qu'algaman más dreichos, solu sientu envidia cavilandu que los sous pollíticos gánan el sueldu que los nuesos cobran ensín trabayare).

¿Sedrá posible que los llïoneses en xeneral sigamos votandu a estos partíos qu'en vuelta de lluitare pulos nuesos dreichos y defendenos escontra los que quieren facenos esapaecere, abangan el sou llombu en Pucela deixándunos ensín defensa dala?

Dengunu de nosoutros pué esqueicere que cunos nuesos impuestos pagan los sueldos d'esos "representantes" que nun trabayan pur nosoutros y nidiamente nun nos representan. ¿Que tenemos de facere cunos trabayadores que nun facen el sou trabayu?

¡¡Despediyes!!

¡¡Pues nidiamente, esu mesmu tenemos de facere cunos políticos que solu piensan nos sous dineiros peru nun trabayan pa ganalos!! ¡¡¡Deixayes ensín trabayu!!!