domingo, diciembre 03, 2006

Ramalazos ditatoriales nel sieglu XXI

Ye mui curiosu vere los ramalazos ditatoriales que tien dalgunos pailanes nel PP y PSOE (y tamién en IU anque eillos nun tán nas istituciones)

Lu primeiru qu'hai que diciles ye qu'esta comunidá ye anticostitucional purque ta fecha escontra los ciudadanos llïoneses y escontra los artículos 2 y 14 de la Costitución. Nesti casu, mesmu que pasen 100 años sigirá siendu anticostitucional, nosoutros sigiremos glayandu pula nuesa llibertá y enxamás nun podrá tornase costitucional pul pasu'l tiempu.

Lu segundo ye que la sua fixación de que'l mapa autonómico tá pechau ye, cenciellamente, lu qu'eillos quieren que creigamos, que nun podemos facere ná de ná. Esa ye la sua idega peru nun ye la nuesa entoncias, mesmu si nun tan gayoleiros pur eillu, nosoutros sigiremos na nuesa llucha ata algamare l'autonomía.

Lu terceiru ye que to@s esos políticos "sucursalistas" y pesebreiros tien de deprendere que somos los llïoneses (zamoranos, salamanquinos y llïones) los que tenemos de dicire si la cousa ta pechada ou non y cumu non tamos d'alcuerdu sigiremos dánduyes la turra lu mesmu agora qu'enantias.

El xueves pasáu, el portavoz socialista na Diputación dixu: "El Estatuto está aprobado, es lo que hay, y no voy a perder un solo minuto en discutir sobre la autonomía de León, lo que a la gente le interesa es tener trabajo y vivir bien y el resto no le preocupa".

¿Imaxináis de quien m'alcordéi d'aqueilla? D'un siñor baixu, fuerte y cun bigote que yera "xeneralísimu". ¿Pescanciais de quien falu? Xustu, de Franco. El tamién dicía que la xente nun taba priocupada pula llibertá y la democracia y que tou taba "atado y bien atado" peru la rialidá ye cazurra (cumu nos, hehehe) y amosóu que las cousas nun taban tan atadinas cumu él creyía y que la llibertá yera mui importante pa la sociedá. ¿Pur quéi lu tendran d'exemplu d'algunos (cuasi to@s) "sociu-listos? ¿Sedrá posible que creigan que tamos d'alcuerdu en que nos deixen ensin nome, ensin llingua, ensin cultura, ensin hestoria y ensin identidá? Y untavía unas entruginas que me tien cavilando tolas nueites:

  • ¿Pur quéi un partíu que dizse socialista fala tol tiempu de solidaridá nas nuesas provincias, que nestos momentos tán nos cabeiros puestos dientru las provincias hespañolas, y nun face lu mesmu nas provincias que tan nos primeiros puestos?
  • ¿Pur quéi nun ye solidariu tol restu d'Hespaña cun nosoutros?
  • ¿Sedrá quiciabes que pa eillos los llïoneses nun somos hespañoles poru nun tenemos dreichu a l'autonomía de nuesu cumu los outros? Quiciabes lu que ZP y sus "rapaces" tienen de sentire'l glayíu de "Somos León y somos NACIÓN" entoncias ye posible que piense qu'esistimos purque paez que solu los pueblos que s'apresentan cumo nación tienen importancia y dreichos pal "vraeiru castiellanu y llïonés", cumu él mesmu diz en Pucela. (Quieru deixar bien craru que nun tengu ná escontra los pueblos que consigen más dreichos, solu sientu envidia cavilandu que los sous pollíticos gánanse'l sueldu que los nuesos cobran ensin trabayare).
  • ¿Sedrá posible que los llïoneses en xeneral sigamos votandu a estos partíos qu'en vuelta de lluchare pulos nuesos dreichos y defendenos escontra los que quieren facenos esapaecere abangan el sou llombu en Pucela deixándunos ensin defensa dala?
Dengunu de nosoutros pué esqueicere que cunos nuesos impuestos páganse los sueldos d'esos "representantes" que nun trabayan pur nos y nidiamente nun nos representan. ¿Que tenemos de facere cunos trabayadores que nun facen el sou trabayu?

¡¡Despedilos!!

¡¡Pues nidiamente, esu mesmu tenemos de facere cunos políticos que solu piensan nos sous dineiros!!! ¡¡Deixalos ensin trabayu!!

1 comentario:

xulio nel dijo...

Prestame abondo saber que nun dexáis morrer la llingua de nueso.
Prestome alcontral el to blog.
Ye un pena que nun esista dialogu ente Asturies y Llión.
Un saludu dende'l país vecín.