Rexón, País, Estau?

Lleu, una vuelta más, desemeyadas opiniones sobru rexonalismu y separtación y alviertu qu'hai eiquí un amecíu que nun sou quien a pescanciare y tengu de dicire qu'una cousa ye sere rexonaliegu, outra nacionaliegu y outra axebriegu.

Nun ye lu mesmu, nin de lluenxe y taría bien qu'entamáramos distingire las desemeyadas posibilidaes qu'esisten.

Rexonaliegu: Nun esiste'l País Llïonés sinon la Rexón Llïonesa, una parte más d'Hespanna. Somos llïoneses peru sobru tou, y mueitas vueltas enantias, somos hespannoles.

Nacionaliegu: Pul momentu facemos parte d'Hespanna peru nel pasáu fumus un país desemeyáu cun llingua, lleis ya identidá bien marcada y desemeyada'l restu de pueblos de lu que guei ye Hespanna. Nun facemos custión prioritaria'l feichu de sere ou nun sere hespannoles peru pa nosoutros tá nidiu que lu cimeiru ye sere llïoneses y aceutamos sere hespannoles na mesma midía qu'Hespanna reconnez que somos un pueblu qu'esiste, cunos mesmos dreichos que'l restu pueblos que facen parte d'Hespanna. Somos llïoneses y si l'estau y los goviernos, central y autonómicu, quieren camudanos en castiellanos ensín respetare los nuesos dreichos y la igualdá que reconneez la Costitución, tamos dimpuestos a deixare de sere hespannoles enantias de deixare de sere llïoneses.

Axebriegu: Nun somos hespannoles, sólu llïoneses y pesia que nun tenemos nin siquiera voz pa proclamare las nuesas idegas y facelas pescanciare al restu l'estau, insistimos n'un independentismu que nun tien reconocencia pula mayor parte los llïoneses.

Creigu que si queremos chegar a dalgún puertu, tenemos d'algamare consensu ente toos. Las tres idegas tien de respetase anque nun temos d'alcuerdu cun eillas. Nun podemos escalificare los que, getandu un miyor futuru pal País Llïones, nun piensan cumu nosoutros, peru sobru tou, nun podemos amecere los tres xeitos de cavilare purque si nosoutros nun lu tenemos nidiu nun podemos asperare convencere a naide.