Música Llïonesa

Guei, la Xana tien ganas de candanga y va falaivos de música feicha en Llión. Nuevas de Pandetrave y musica de Gandalf y SOG. ¡¡¡Que vos preste!!!:

El domingu, Outubre y 4, nel que la ciudá de Llión cellebra'l patron la diócesis de Llión, Santu Fruela, a las 13,00 houras, na Plaza Mayor, autuará'l grupo de Folk Llïonés Pandetrave.

Pandetrave

Cumu sabedes, nas fiestas de Saxuan na ciudá de Llión, recuperóuse'l Festival Celta nel que, amas las autuaciones d'Awen Magic Land, Los gatos del Fornu, Beoga y Fred Morrison, pudimos sentire y bailare la música los astorganos Gandalf.

Pa la Xana, ensin dulbia denguna fou lu miyor de las fiestas y aspera que'l annu viniente siga'l Festival Celta y podamos sintire outra vuelta a Gandalf.

Mientas chega la prosima autuación, podedes sintire una parte piqueña de la tema Pumpkin's Fancy del sou nuevu discu "Con_fusión" nel sigiente vidiu.



Y nun pueu resistime a deixaros outra canción de Gandalf que se chama "La Xana blanca" ¿pur quéi sedrá?



Y, pa finare, eiquí vos deixu outru piqueñu vídiu d'un ensayu de SOG

Llïonpedia, la nuesa llingua n'Internet

La prestixosa axencia d'Estados Xuníos "ALEXA" que mide la popularidá las páxinas d'Internet, sitúa la Llionpedia, ente las 50.000 páxinas gueb más importantes d'Hespaña. Concretamente nel puestu 42.938, lu qu'amuesa un gran ésitu pa una llingua minorizada ya esqueicía cumu ye la llingua de nuesu.

http://www.llinguallionesa.net/ o www.llionpedia.eu

La Llionpedia tien ya más de 15.000 artículos feichos en llingua llïonesa, lu que faz d'eilla la enciclopedia virtual más importante nel dominiu linguístico llïonés. Las cuasi 250.000 visitas, 60 usuarios rexistraos y más de 20.000 páxinas facen d'esta ñiciativa de la Conceyería de Nuevas Teunoloxías y Cultura Llïonesa del Conceyu de Llión, la más importante las desendolcadas pa la promoción la llingua llïonesa ata agora.

Podedes gueyare la nueva completa na sigiente lligazón:

http://www.leonoticias.com/frontend/leonoticias/La-Llionpedia-Crece-vn36621-vst216

La Xana quiere felicitare al Conceyeiru, Abel Uxeniu Pardu, a los sous collaboradores, a los sous usuarias rexistraos, a los visitantes la Llionpedia y a tolos llïoneses pula idega y pul sou desendolque, animandu a tolos qu'entavía nun lo ficionun a visitare la páxina y a collaborare n'eilla.

Cumu vien diciendu dende cuantayá, la Xana ye llïonesista pur ecoloxía, si nun nos presta qu'una especie vexetal ou animal desapaeza ¿cumu vamos consentire que desapaezan la nuesa llingua y la nuesa identidá?

Ara Antón, LLÏONESA y argullosa de selu

Finu de lleere la cabeira entrade nel blog d'Ara Antón y solu puedu dai gracias al cielu qu'a lu menos hai una LLÏONESA con lletras mayúsculas nesti Llión los nuesos pecaos.

Vraeiramente, dende que conocí a esta escritora pescancié que yera una muyer "de cuerpu enteiru", que nun se casa cun naide (esceutu'l sou mariu, tamién un home cunas idegas nidias) y que llucha pu tolu que cree xustu.

Ye pur esu que sigu'l sou blog purquei nun importa de qué fale, siempres fácelu cun sentíu y chamandu las cousas pul sou nome.

Van deillos dias que lleí'l sou artículu subre "Hillary Clinton y la falta d'identidá femenina" (http://araanton.blogspot.com/2009/08/hillary-clinton-y-la-falta-de-identidad.html) cul que tou nidiamente d'alcuerdu y penséi falare subre eillu nesti requeixu del Reinu de Llión que ye'l Llagu la Xana peru la falta rellación de la tema cuna reivindicación llïonesa y, sobru tóu, la falta tiempu, ficionunme deixalu un díya y outru y outru, ata guei.

Quiciabes pensaredes qué camudóu guei pa faceme buscare un guequín pa escribire. Pues ye mui cenciellu. Guei tornéi entrare nel blog d'Ara y alcontreime cun outru artículu peru esta vuelta la tema yera mueitu más prósima.

Ara fala subre la tierra de nuesu y fala ensin "paños calientes", chamandu las cousas pul sou nome, cuasi, cuasi glayandu pula llibertá'l nuesu pueblu escontra tolos que quieren facelu esapaecere peru tamién escontra aqueillas xentes de nuesu qu'amuesan pouca ou denguna dinidá y que nun son quienes a defendere la tierra los sous guelos, ni los sous dreichos, ni tampoucu'l futuru los sous fiyos.

Esta ye la lligazón al artículu d'Ara que vos recomiendu lleere, siguru que va prestaivos, mesmu'l títulu ye prestosu asgaya:

La línea Sama-Velilla y los reinos de taifas

http://araanton.blogspot.com/2009/08/la-linea-sama-velilla-y-los-reinos-de.html

¡Gracias ambute, Ara, pur sere cumu yeres!