Fin de selmana de "manifas"

El vienres, Agostu y 25, la xana fue de "manifa" a Cistierna. La montaña oriental llïonesa tien un serviciu d'ambulancias PERGUAPU, sobretudo polas nueites cuandu una ambulancia, ensin médicu y ensin ATS, atiende a 15.000 llïoneses (a más de los turistas nel branu) con distancias de más de 150 kms en dalgunos casos y con carreteras que más paicen "montañas rusas" que vraeiras infracadarmas del sieglu XXI.

Sigún dalgunus ye un servicio "normal" porquéi'l poucu presonal qu'habita la montaña nun da pa tenere meyor serviciu. Nun fai falta que vos diga onde viven los que dices tales cousas. ¡Xustu! ¡en Pucela! ¿comu ye posible qu'hayais devinau la rimpuesta?

El sábadu, Agostu y 26, tocaba dir a Peque, na provincia Zamora, onde un "chiquilicuatre" con tiesta borricu, quié que s'istale un cimiteriu nuclear. ¡PAIS LLÏONÉS ANTINUCLEAR!

Pudienun gueyase banderas asgaya del Reinu de Llïon porquéi cuasi tres cuartas partes de l'asistencia yera de la nuesa provincia (a más de dos rodeas colgadas d'un palu, ye bien curiosu sacalas d'esa guisa, na mía cá deixanse na trébede peru ¡hai gustos pa too!)

Lu que la xana nun chega pescanciare ye'l cuidau que tien los cámaras la TV por nun sacare las nuesas banderas nas semeyas. Tantu'n Cistierna comu'n Peque ficienun "dibuxines" por nun sacanos ¿de quéi tien mieu? ¿Ye que la nuesa bandera ye subersiva?

Estu face pensare a la xana na "manifa" de Xunu y 3. Denguna nueva sobre la mesma nos medios de comunicación nacionales ¿Por quéi? Sigún ICAL yéramos 5.000 llïoneses y nun creigu que nos regalase un solu manifestante ¿Nun ye importante que dimpues 23 años de colonización castiellana, sigamos pidiendu la nuesa autonomía? ¿Nun dixen siempres "qu'en ausencia de violencia" pue falase de too? ¿Quiciabes debemos pensare que ye pola ausencia de violencia que nun tenemos dreichu a salire nas nuevas?

La Sanidá ye propria'l tercer mundu, tratan de enterranos en cimiterios nucleares, robannos l'augua del Esla (hai un proyeutu de facere una gran presa'n Villalón pa regare toa la provincia Pucela) y por cima too estu niegannos fasta'l mesmu nombre y falannos de "solidaridá" ¿dende cuandu ye'l probe quien tie que sere solidariu col ricu?

¡POLA NUESA IDENTIDÁ, LA NUESA CULTURA Y LA NUESA LLINGUA!
¡¡¡AUTONOMIA LLÏONESA YÁ!!!

La Sanidá llïonesa

El prósimu vienres, Agostu y 25, a las 12,00 houras, tá convocada una "manifa" en Cistierna escontra la situación de la sanidá na zona la Montaña (y creigu qu'en tol Pais Llïonés).

Ya tamos fartos de nun tenere ambulancias medicalizadas, nun tenere atención médica pola nueite o nel fin de selmana. ¿Comu ye posible que'l hospital Villablinu té finau fai varios años peru siga cerrau por falta de presonal?

Llïoneses ¿¿¿sigiremos aguantandu siempres lu que dispongan los castiellanos??? ¡¡¡Basta ya!!! ¡AUTONOMIA LLÏONESA! ¡¡¡YA!!!

¡Qué guapu ye'l branu!

¡Tou rilada! El branu ye pa la xana la miyor época del añu peru tien un gran problema. En branu ye precisu trabayar nel guertu.

Guei, dimpues de 4 dias chuviendu y dalgunos outros con buen sol, la yerba taba crecía y yera precisu segala y deixare'l xardin atuldadin pa la prósima selmana. Sobre tudu las malas yerbas medran comu tales y paseme toa la tarde trabayandu ensin parare. Uffffffffff agora ta too mui guapu peru you nun pueo poneme dreicha.

Comu diz un de los mieus primos: "Esu ye de la pila.... ¡de la pila d'años que vamos teniendu! jajaja. Y lo que ye pior, mañana tendréi que trabayare nel guertu, si nun fuera polo guenos que tan los tomates y los pimientos, las peras y los piescos, los figos...., ummm, fáceseme la boca augua.

Peru anque cansaina, tou gayoleira, toa la mia vida soñéi con un guertu y ¡por fin! tengulu. ¿Que más se pue pidire que gueyar los nuesos suaños fechos rialidá?

OFICIALIDA ¡¡¡YA!!!

La selmana pasada la Xana fizu turismo pol Sur de Llión, concretamente na Ciudá de Salamanca y na Tierra de Lledesma. Siempres ye prestosu visitare dambas ciudaes y truxo nuevas bonas y malas.

Prencipiemos polas malas: la propaganda castiellana ta presenti tol tiempu, por exemplu "Autovía de Castilla" apaez nos carteles del Ministeriu Fomentu, na radiu "Intereconomía" falandu de los tiempos d'Almanzor, refirienunse a los "castellanos" y sobre tudu, la "rodea a cuadros" apaez por toas partes.

Agora vamos polas bonas: El sábadu, Agostu y 6, espublizóuse un reportax nel diariu Tribuna sobre la nuesa llingua, ciertu que con dalguna inesautitudes peru, en xeneral taba mui prestosu peru lo vraeramente importante ye de sentir a los paisanos salamanquinos que se "perniquiebran", usan platos "pandos ou bados", tien pelu "guapo", "llamben" los restos del pastel, andan "alredor" la casa ou falan de las cousas que pasaron "cuantayá".

Esu sí, nun veais las suas caras surprendidas cuandu dalguien diceles: "toas esas pallabras son llïonesas". ¿Vraeiramente? Siempres hai dalguien más enterau que diz: "Asin ye comu falaba la mia mai peru guei ya nun se fala" ou bien "you falé asin fasta qu'en la escuela aprendienunme a falare bien".

Ye precisu diciles que too esu ta bien faláu, que lu qu'acaez ye qu'esas pallabras son d'outra llingua, la nuesa, la de los nuesos pais y guelos. Quiciabes asín recuperen l'orgullo de sere llïoneses.

¡Somos llïoneses y la nuesa llingua, la más vieya llingua romance na península, entavía ta viva!
¡Nun la deixemos morire! ¡OFICIALIDÁ! ¡¡¡YA!!!

PAIS LLÏONÉS, TAMOS DE VACANCIAS?

Esti branu la Xana tovía nun tien vacancias pulu que nun deixóu'l Pais Llïonés. Ye precisu falare con tol mundu pa preparare las aiciones los prósimos meses de Setiembre y Outubre que, paiz, sedrán "calientes".

Peru ¿qué miyores vacancias podemos tenere los llïoneses qu'amamos la nuesa tierrina que facere turismo nel País Llïonés y al mesmu tiempu glayar escontra los cimiterios nucleares y pedire robras pula nuesa Autonomía?

Nel asuntu la enerxía nuclear, tá preparánduse una gran "manifa" en Çamora escontra'l cimiteriu de Peque. Toos los llïoneses de las tres provincias tan chamaus a dire a la "manifa" cunas suas bandeiras llïonesas. El nuesu futuru y el futuru los nuesos fiyos tá en xuegu. La xana dirá y vosoutros?.

La Xunta de Castiella (que nun de Llión) ofrecióu el territoriu la Comunidá pa la instalación del cimiteriu nuclear, tá nidiu que nun pensaban nel territoriu castiellanu sinon nel llïonés. Vamos consentilu ou diremos toos glayare: "Pais Llïonés non nuclear"?

Y nun podemos esqueicer outra cousa, el cimiterio nuclear ye'l preciu que la Xunta pagará'l goviernu central pulas competencias sobru la Confederación Hidrográfica del Dueru. P'algamare'l robu l'augua los nuesos rios, van ponenos un cimiteriu nuclear!!! Qué vos paez el negociu pal País Llïonés?

Y que naide diga que van paganos 12 millones d'euros pul cimiteriu. Sabedes quien recibirá'l dineiru? Xustu! La Xunta Castiella. Ónde creéis van gastalos? Esautu! En Pucela! Esautamente lu mesmu que fizun cunos fondos mineiros urupeyos.

Reinu de Llión ensin Castiella ye vida! País Llïonés, paraiso na tierra! (Acordaivos que nel Paraisu tenían una culuebra, nosoutros tenemos la Xunta que ye mueitu pior)

AUTONOMÍA LLÏONESA! YA!!!

La identidá del Presidente Zapatero

Fai algunos dias, en La Bañeza, apresentouse'l llibru de Carlos Junquera Rubio "Vigias en los Rios".

Nun momentu de l'apresentación, l'autor del llibru dixu "Tou fartu de sentire al Presidente que vascos y catalanes tien muncha identidá mais nunca fala de la sua ¿onde tá la identidá de ZP?

La rimpuesta chegou dende'l públicu: "Tá en Pucela". Toa l'asistencia aplaudiou menos el Subdelegau'l Gobiernu que taba, pelín incomodo, na primeira fila d'asistencia.

¡¡¡EL PUEBLU LLÏONÉS DEISIXE RESPETU PALA SUA CULTURA, LA SUA LLINGUA Y LA SUA IDENTIDÁ!!!